O Foro Galego de Inmigración reclama cambios ao "novo goberno" na Lei de Estranxeiría, que "mata silenciosamente"

(17/06/2019)

O Foro Galego de Inmigración reclama cambios ao "novo goberno" na Lei de Estranxeiría, que "mata silenciosamente"


galiciapress.es

Europa Press | sábado, 15 de xuño de 2019,


O portavoz do Foro Galego de Inmigración, Miguel Fernández, esixiu ao novo Goberno central que se fagan "proximamente" cambios "substanciais" na Lei de Estranxeiría, unha norma que "mata silenciosamente".

Baixo o lema 'A Lei de Estranxeiría Mata!', o Foro Galego de Inmigración celebrou na mañá deste sábado un encontró na Casa Museo Casares Quiroga da Coruña para expresar as súas demandas.

O acto consistiu, en primeiro lugar, nunha rolda de prensa na que compareceron Rubén Sánchez e Miguel Fernández, coordinador e vogal do Foro na provincia da Coruña.

Máis tarde, tres persoas da plataforma 'SOS Racismo'; Mohamad Said Ahmad, Zinthia Álvarez e Oluchi Onuegbo ofreceron unha charla para dar a súa opinión e expoñer as súas reclamacións. Por último, procedeuse á lectura dun manifesto no Obelisco coruñés.

"ELIMINACIÓN DOS CIES"

Deste xeito, en declaracións a Europa Press, Miguel Fernández explicou que, con esta iniciativa, buscan "cambios" en cuestións como "a eliminación dos Centros de Internamento para Estranxeiros (CIE)", así como que se poida entrar en España por vías legais, sen o control que hai actualmente nas fronteiras".

Segundo Fernández, "a irregularidade administrativa debe suprimirse, porque moitas persoas viven en España, teñen unha vivenda e teñen aos seus fillos no colexio pero non poden acceder a moitos dereitos".

Ademais, sobre os centros de internamento, o representante do Foro engadiu que estas infraestruturas "son practicamente peores que os propios cárceres". "Moitas persoas están retidas por unha simple falta administrativa e son tratadas como delincuentes", criticou.