A Secretaría Xeral da Emigración aplaudiu o labor que as asociacións Queixumes dos Pinos e Alma Llanera están a realizar desde hai anos na cidade de Ourense en prol da igualdade. O subdirector xeral da Emigración e das Comunidades Galegas, Antonio Casas Calviño, quen asistiu en representación do departamento autonómico á clausura da quinta edición das Xornadas Interculturais que organizan as agrupacións, salientou o esforzo que estas dedican ao traballo de integración tanto dos emigrantes galegos e galegas que regresan á súa terra de orixe como das e dos inmigrantes. 

O acto puxo fin a varios días de programa no que, baixo o lema Construyendo camino hacia la igualdad, se celebraron mesas redondas, conferencias sobre diversos temas relacionados coas migracións e as políticas de axudas sociais, e obradoiros de diferentes instrumentos musicais e danzas.