A emigración na Costa da Morte aínda é moi alta, pero parouse en seco

(25/03/2019)

A emigración na Costa da Morte aínda é moi alta, pero parouse en seco

Xa hai máis de 38.000 veciños que viven no estranxeiro, pero o aumento nun ano apenas superou as 200 persoas 

TANIA FIGUEROA


La Voz de Galicia
s. g. rial
carballo / a voz 23/03/2019

A emigración de veciños da Costa da Morte no estranxeiro segue sendo moi elevada, e ademais acaba de alcanzar a cifra máis alta dos últimos dez anos, desde que existe o Padrón Español de Residentes no estranxeiro (PERE). O deste ano publicouse esta semana, e arroxa un saldo de 38.090 persoas oriúndas de Bergantiños, Soneira e Fisterra, ademais de Cerceda, que residen no estranxeiro. Unha cifra impresionante, máis aínda se se ten en conta que os empadroados nos 16 municipios da zona son 110.868. Este censo non parou de baixar; o outro, non parou de crecer.

E, con todo, pode extraerse algunha cifra positiva de todos estes datos? Si: por primeira vez neste decenio de análise de datos o aumento é apenas significativo, con pouco máis de 200 altas novas. Nada que ver con anos anteriores. Pero xa o pasado aventurábase un cambio de ciclo, cando o incremento foi de pouco máis de 3000 residentes no exterior de aumento. Empezaban a quedar lonxe as cifras dun milleiro de persoas de media de incremento ano tras ano.

Hai un parón claro na emigración, agora que está concluído ese ciclo recente de éxodos a Suíza ou Inglaterra, sobre todo, que é o que moveu máis os números nos últimos tempos, ademais das naturalizacións americanas que incrementan dun modo máis ou menos artificial a conta de emigrantes. Por iso Vimianzo ten oficialmente case 5.000 veciños no estranxeiro, ou Carballo máis de 6.000.

Carballo ten agora mil residentes máis no exterior que Ferrol

 

Os 6.092 emigrantes de Carballo no estranxeiro son a metade dos que ten Santiago, ou mil máis dos de Ferrol, municipios que superan en poboación a capital de Bergantiños, así que a porcentaxe é aínda máis rechamante. O máis destacable destes números é que son reais. Na cidades aparecen vinculadas moitas persoas que non son orixinarias desas localidades, pero con municipios con forte carga migratoria non hai dúbida. Ocorre, por exemplo, con Santa Comba, con 4.686 persoas no exterior, ou A Estrada, con 5.980, que habitualmente se situaba por encima da capital de Bergantiños, e xa hai dous anos que non. A poboación de Vimianzo fora é mesmo máis rechamante. En total, a comarca achega máis do 21 % de emigrantes de toda a provincia.

 

 

¿Olvidou o seu contrasinal? | Alta