(21/03/2019)
vigo / a voz 20/03/2019
Hai 57 países de todo o mundo nos que non hai ningún galego. Pero hai 18 máis nos que reside só un, segundo os rexistros consulares dos case dous centenares de países recoñecidos pola ONU.
Si a ausencia de galegos é especialmente notable no continente africano, o mesmo escenario territorial é onde se concentran os Estados nos que a presenza galaica se reduce á mínima expresión. Botsuana, Gambia, Guinea, Mali, Serra Leona, Seychelles, Togo e Zambia son os oito países de África nos que os rexistros consulares actualizados a 1 de febreiro pasado dan conta da procedencia de Galicia dunha única persoa.
Na división de Europa e Asia ocorre o mesmo en Xeorxia, como en América sucede en Antigua e Barbuda, Belice (onde en só un ano o número de galegos rexistrados pasou de doce a un) e nos arquipélagos de San Cristóbal e Nieves ou no de San Vicente e as Granadinas.
En Asia os países cun galego son Brunei, Kazajistán, Birmania e Sri Lanka. Xa en Oceanía, continente onde proliferan as illas Estado sen rastro oficial de galegos, hai un en todo Timor Oriental.
A sétima da lista
A pesar da fama migratoria dos galegos, da súa presenza nos cinco continentes e de contar con máis de medio millón de integrantes a súa diáspora, Galicia non é a comunidade española máis exploradora, a tenor do censo elaborado cos rexistros consulares. O mes pasado eran seis as autonomías que contaban con residentes en máis países que Galicia. Mentres que hai galegos en 138 Estados, a Comunidade de Madrid, que abre ese ránking, ten presenza en 165, aínda que a capital de España se beneficia da atribución de descendentes de españois que carecen de provincia clara de procedencia dos seus devanceiros emigrados. Cataluña está presente igualmente en 164 países e Andalucía en 158, e coa Comunidade de Madrid son os tres focos máis reiterados da presenza española polo mundo.
Superan tamén a Galicia en extensión migratoria a Comunidade Valenciana (147 países), Castela e León (145) e o País Vasco (144). Melilla é o territorio con menos representación internacional no exterior, pois só hai residentes do devandito enclave en 54 países. Séguenlle Ceuta (57) e A Rioxa (80).
Pero a pesar de que a emigración galega e a súa descendencia que accedeu á nacionalidade española é menos extensa territorialmente, Galicia segue sendo o referente de adscrición da maior parte da diáspora española. O 20,4 % da colonia exterior procede directamente ou ten como referencia censal a algunha das catro provincias galegas. Ningunha outra comunidade supera os 519.646 galegos residentes no estranxeiro, e tras Galicia sitúanse Madrid, con 400.137, e Cataluña, con 316.599.
Hai españois en todos os países do planeta menos en catorce: Bielorrusia, Bután, Comoras, Dominica, Illas Marshall, Lesoto, Kiribati, Malaui, Nauru, Samoa, San Marino , Tonga, Turkmenistán e Cidade do Vaticano, onde os seus residentes están adscritos a Italia e non ao enclave católico.
A adscrición aos rexistros de China vai en aumento, e son xa 2.722 os españois que residen oficialmente no país. O mesmo ocorre é escenarios máis difíciles, como Palestina, onde están inscritos 209.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas