Crece un 45 % o número de menores estranxeiros non acompañados en Galicia

(04/02/2019)

Crece un 45 % o número de menores estranxeiros non acompañados en Galicia

Actualmente son 169, fronte aos 116 que había no verán // En 2018 duplicáronse os Menas no Programa Mentor

Varios menores estranxeiros non acompañados (Menas) chegados á costa de Cádiz en patera, o pasado verán. Desde alí son distribuídos polo resto de comunidades autónomas - FOTO: ECG



O Correo Galego

REDACCIÓN
A- A+



Os 169 menores estranxeiros non acompañados (Menas) que acolle a comunidade galega na actualidade, segundo informa a este diario a Consellería de Política Social, representan un incremento do 45,7% con respecto a fai soamente seis meses. A principios do mes de agosto de 2018, tamén con datos da propia Xunta, eran 116 os Menas en Galicia. Segundo as cifras oficiais, no ano 2017 eran só 84 os menores estranxeiros non acompañados a cargo da Xunta.

Un Mena é todo aquel menor de 18 anos que chega ao territorio español (a maioría arriba ao Estreito de Xibraltar ou a outras zonas da costa de Cádiz) sen vir acompañado dun adulto responsable del, apreciándose risco de desprotección. Tamén pode darse o caso de que chegue con adulto pero unha vez en España se atope en situación de desamparo, segundo informa o Ministerio de Interior.

As diferentes administracións autonómicas fanse cargo destes menores, sendo no caso da galega o departamento de Política Social o encargado da súa protección e benestar.

Preto da maioría de idade Residen nos diferentes centros de menores de Galicia aínda que, polas súas especiais características -adoitan ser adolescentes próximos a cumprir a maioría de idade-, son candidatos perfectos para o programa Mentor que a entidade Igaxes desenvolve desde hai anos.

Polo Mentor de Igaxes -que prepara para dar o salto á vida laboral e adulta aos menores tutelados pola Administración- pasaron en 2018 37 Menas, todos eles homes e maioritariamente de orixe marroquí (29). Do total de altas rexistradas en 2018 no Mentor, 545 -323 homes e 222 mulleres-, eran de orixe estranxeira 96 (68 homes e 28 mulleres). En 2017 pasaron por el 18 Menas.

Igaxes explica a este diario que en 2018 "duplicouse" en termos absolutos o número de menores estranxeiros non acompañados que foron alta no programa Mentor con respecto a 2017. Con todo, indican, hai que ter en conta que o seu número "descendía ano a ano desde o período de crise" e pese ao cambio de tendencia "aínda estamos lonxe dos datos previos a 2010".

Nova perspectiva Así mesmo, Igaxes observa unha circunstancia nova, "mentres antes o habitual era que os rapaces chegasen cunha idea moi clara de buscar traballo para atopar un medio de vida canto antes, agora son máis os que procuran mellorar a súa educación, e as súas expectativas de futuro son máis altas". E engaden que é preciso lembrar o feito de que "debido ás marcadas diferenzas nas circunstancias vitais, culturais e de orixe dos Menas, a aplicación de solucións comúns é un erro. Cada un necesita o seu proceso individual e solucións socioeducativas adaptadas". Ademais, sinalan que para moitos Galicia é "estación de paso".