O Centro Partido de Carballiño, de Buenos Aires, celebra ao grande o seu centenario

(20/11/2018)

O Centro Partido de Carballiño, de Buenos Aires, celebra ao grande o seu centenario

De esquerda. a dereita, Miranda, Emilio Nogueira, Francisco Fumega, López Carballedo e Benito Santalices, expresidente da entidade.

Mariana Ruiz, Buenos Aires | 18 Novembro 2018 - Crónicas da Emigración

Pasadas as 12 do mediodía, os grupos de baile, música e canto da colectividade, cos seus traxes típicos e instrumentos deron un abrazo simbólico ao Centro Partido de Carballiño no seu aniversarios número cen. “Convidamos a todos os centros a participar nesta celebración porque o centenario deste centro, así como o de cada institución galega, ten que ser unha festa de todos para celebrar unha traxectoria de cen anos de traballo mancomunado”, sinalou Silvana Reynoso, secretaria do Centro de Carballiño.

Pouco despois chegou a hora do xantar que coroou unha semana de festexos que contemplou diversas actividades culturais.

A reunión iniciouse cun minuto de silencio e 44 golpes de tambor para lembrar aos submarinistas do ARA San Juan, finalmente achados, tras un ano de procura incesante.

Preto de oitocentos convidados déronse cita na sede do Centro de Carballiño, en Vicente López para celebrar o seu centenario. Entre eles, o intendente municipal de Vicente López, Jorga Macri; o embaixador de España, Javier Sandomingo; o cónsul xeral, Javier Gil; o secretario xeral de Emigración, Antonio Rodríguez Miranda; o delegado do Goberno galego en Arxentina, Alejandro López Dobarro; o deputado provincial de Cooperación de Ourense, Pablo Pérez; os alcaldes de Carballiño, Francisco Fumega; de Cea, José Luis Balladares; de San Amaro, Ernesto Pérez; e directivos de entidades do colectivo.

“Cen anos de vida –observou o secretario xeral de Emigración–, déixannos fronte a un cambio xa non dunha senón de varias xeracións”. “O 70% dos galegos en Arxentina e no mundo xa naceron fóra de Galicia. Iso significa que temos que adaptarnos a esta nova realidade e traballar para esas xeracións que se senten arxentinas, uruguaias, suízas, alemás ou británicas e, ao mesmo tempo, galegas. Esa é unha oportunidade que Galicia ten que seguir aproveitando”, avanzou Miranda.

“No pasado –concluíu– Galicia construíuse ao mesmo tempo desde dentro e desde fóra e no futuro tamén se ten que construír así e nese futuro tamén teñen que participar os galegos do exterior”.

Pola súa banda, o presidente da Casa, Emilio Nogueira, destacou a traxectoria deste Centro, que leva cen anos de vida ininterrompida en favor dos galegos, difundindo a cultura e as tradicións de Galicia en Arxentina.

Nogueira destacou tamén o desafío que ten a asociación de fronte ao futuro para continuar traballando solidaria e mancomundamente con outras entidades para manter vivo o legado dos galegos.

No marco dos festexos, o Centro de Carballiño entregou unha placa á asociación Fillos de Cea, que celebrou este ano o seu 60º aniversario e ao conxunto ‘Airiños do Carballiño’, que tamén cumprirá en decembro próximo o seu décimo aniversario.

Homenaxe do Concello do Carballiño

Unha comitiva do Concello do Carballiño, encabezada polo seu alcalde, Francisco Fumega, viaxou especialmente para participar na celebración do centenario da asociación. “Lembrar o espírito daqueles galegos e galegas que chegaron a este país, cos seus soños, servirá para proxectar esta entidade galega outros cen anos máis”, destacou o alcalde, o domingo pasado durante a celebración.

Francisco Fumega rescatou os propios testemuños que deixaron os emigrantes “que chegaron ao país nas primeiras décadas do século pasado impulsados por un espírito de progreso, que se integraron ao país que os acolleu e que souberon honrar as dúas culturas, a de orixe e a de adopción”, sinalou lendo algúns dos artigos publicados na revista ‘Arenteiro’.

O alcalde de Carballiño lembrou tamén o seu espírito altruísta, co que foron capaces de levantar centros como o de Carballiño e o Colexio que edificaron en Banga, conscientes da importancia da educación, “aínda –dixo– sendo moitos deles analfabetos”.

A comitiva presentou así mesmo unha edición especial da primeira revista ‘Arenteiro’ do Centro Partido do Carballiño en Buenos Aires, editada polo Concello do Carballiño, con motivo do centenario da entidade.

Xunto ao titular do Executivo municipal, estiveron presentes o deputado provincial de Cooperación por Ourense, Pablo Pérez, e os alcaldes de Cea, José Luis Balladares, e San Amaro, Ernesto Pérez, entre outros integrantes da corporación municipal carballiñesa.

Animaron a festa, que se prolongou ata entrada a tarde, coa actuación especial do recoñecido cantante de tango Jorge Tena e do tamén artista destacado Laureano López Lois. Acompañaron a Tena dous bailaríns profesionais da música cidadá, entretezendo lazos das dúas beiras do Atlántico.