(30/10/2018)
A construción gaña activos en Lalín, A Estrada, Cruces, Cerdedo-Cotobade e Forcarei. // Bernabé/J. Lalín
A práctica totalidade dos municipios de Deza e Tabeirós-Montes foi capaz de incrementar no último ano traballadores activos e soamente Agolada mostra uns indicadores peores que hai doce meses. Os datos de afiliación á Seguridade Social difundidos onte polo Instituto Galego de Estatística (IGE) referidos ao lugar de residencia dos cotizantes e correspondente ao pasado mes de setembro evidencian unha recuperación no emprego nos últimos doce meses, con 513 afiliados máis que en setembro do ano pasado. Desta cantidade, 44 son traballadores estranxeiros.
Este rexistro constata o número de cotizantes, que non o censo de afiliacións, que adoita ser maior ao incluír posibles altas ou baixas nun mesmo traballador nun período de referencia. O nove municipios das comarcas totalizan 25.326 traballadores activos, dos que 643 son persoas doutras nacionalidades. As altas en afiliación entre os activos foráneos tamén se incrementan en todos os territorios da zona, a excepción, tamén, de Agolada, que mantén exactamente os mesmos que tiña un ano atrás. En primeiro lugar podemos analizar o censo absoluto de cotizantes por municipios, onde se corrobora a tendencia positiva no mercado laboral. A Estrada, o municipio con máis afiliados á Seguridade Social, é tamén o que máis crece en termos absolutos ao gañar 208 nun ano e aglutinar ata 7.557 veciños contribuíndo ao sistema público coas súas retribucións laborais. Por detrás da capital de Tabeirós está a dezana, que viu incrementado o seu número de cotizantes en doce meses en 169 persoas e chega ata os 7.404. En Silleda son 62 máis, para alcanzar os 3.453 activos, mentres que Vila de Cruces gaña 48 e suma agora 1.918. Rodeiro é capaz de manterse dentro dos concellos cunha tendencia positiva e as súas 965 cotizantes son catro a maiores en doce meses. Tamén sobe, en concreto en dez casos, Dozón, para aglutinar 415 afiliados. Agolada, como apuntaramos con anterioridade, cede activos; en concreto 21, e queda en 750. A situación nos dous municipios de Terra de Montes é distinta. Mentres Cerdedo-Cotobade incrementa nunha trintena os seus afiliados á Seguridade Social e chega ata os 1.815, en Forcarei son tres a maiores e un total de 1.049.
O número de afiliacións por sectores nun ano nas comarcas sobe en 206 casos na industria, 67 na construción, 340 nos servizos e baixa en 23 no agro. Neste gremio a caída é común en todos os casos excepto en Cerdedo-Cotobade. Da diferenza positiva da industria, 77 afiliados a maiores foron en Lalín e 33 na Estrada. E na construción só mellora os datos estes dous concellos, xunto cos de Vila de Cruces, Cerdedo-Cotobade e Forcarei.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas