(19/07/2018)
l.f. | xinzo/celanova 19.07.2018 | Faro de Vigo
Reunión en Celanova cos emigrantes retornados. // FdV
O secretario provincial de Emigración, Luís Gulín, realizou uns encontros informativos cos emigrantes retornados de Alemaña en Xinzo de Limia e Celanova, acompañado por Elvira Lama, deputada provincial e portavoz socialista en Xinzo, e por Aida Rodríguez, secretaria de organización dos socialistas de Celanova, María Jesús Miranda, secretaria provincial de Industria e Comercio, e Isabel Gil, deputada provincial e portavoz socialista no Concello de Ramirás.
Ao redor de 40 persoas asistiron ás reunións onde o secretario provincial informou as novidades tributarias para 2018 no sistema español, o novo imposto do 5 por cento que aplica Alemaña ás pensións que se cobran por primeira vez desde xaneiro de 2015 e os casos, circunstancias e trámites a realizar ante as autoridades dese país para solicitar as prestacións económicas de axuda á dependencia.
Desde xaneiro de 2015 en aplicación do novo convenio hispano alemán do ano 2012, Alemaña reclama un 5 por cento da pensión, que será un10 a partir de 2030, para as pensións que se cobren por primeira vez. Pero posteriormente os afectados teñen que facer unha declaración complementaria ante a Facenda española para evitar a dobre imposición internacional.
Nestes encontros os emigrantes retornados demandaron a Gulín a derrogación da figura tributaria dos dous pagadores que prexudica non só ao colectivo dos retornados senón ás clases máis desfavorecidas da sociedade que teñen que subsistir con traballos temporais e múltiples contratos, sendo penalizados co pago de IRPF en comparación cos que teñen un só pagador. Gulín comprometeuse a trasladar a petición aos parlamentarios provinciais das Cortes. O próximo encontro será no Carballiño o día 30.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas