O alcalde de Monforte, José Tomé , ten previsto manter unha reunión esta tarde con representantes provinciais da Cruz Vermella para abordar a situación dos refuxiados que buscan asilo en Europa polos conflitos bélicos nos seus países de orixe. Esa mesma problemática foi abordada o pasado luns no transcurso da última xunta de portavoces, aínda que non figuraba inicialmente na orde do día. Tomé expuxo aos representantes dos partidos da corporación as medidas que pensa adoptar para dar asilo a persoas que foxen da guerra.
Segundo explicou o alcalde, o Concello está á espera de recibir novas indicacións respecto diso por parte da Federación Galega de Municipios e Provincias (Fegamp). Os portavoces municipais valoraron a posibilidade de comezar a traballar nun censo de vivendas dsiponibles que se poderían destinar a estes refuxiados.
Ofrecemento previo
Monforte dirixiuse por escrito á Fegamp a comezos deste mes para trasladarlle a súa disposición a acoller, na medida do posible, aos refuxiados que foxen das guerras de Siria e Iraq. O alcalde instaba neste escrito aos gobernos central e autonómico a liderar unha actuación coordinada para que este tipo de ofrecementos sexan realmente eficaces. Tanto o BNG como Esperta Monforte realizaron chamamentos á solidariedade do Concello coas persoas que buscan asilo.