O Concello de Ferrol anunciou a súa intención de sumarse aos municipios que se ofreceron a configurar unha rede de acollida para os refuxiados sirios, a cuxo drama puxo imaxe onte a terrible instantánea do pequeno Aylan Kurdi, morto a beiras dunha praia turca.
O primeiro edil ferrolán dixo que «ou Concello está disposto a atender e cooperar en todo tipo de necesidades humanitarias que outras Administracións rexeiten».
O rexedor local Jorge Suárez indicou que a situación no medio Oriente e África é a que «Europa pretende rexeitar con medidas propias do capitalismo máis cruel, levado adiante por Angela Merkel acompañada por Rajoy».
Suárez puxo a disposición o refuxio de Caranza, os servizos sociais municipais e «unha rede de entidades non gobernamentais coas que estamos dispostos a colaborar para artellar unha solución conxunta, con disposición e capacidade de facelo».
Por outra banda, o Partido Popular de Neda instou ao goberno nedense a elaborar de forma urxente un plan para prestar axuda e colaboración aos refuxiados. Os populares propoñen ao Concello que tramite ante o Ministerio de Asunto Exteriores e de Cooperación e da Xunta de Galicia o ofrecemento municipal a «acoller toda clase de refuxiados» para os que porían a disposición «edificios públicos e vivendas baleiras».