A presión migratoria volveu a descoser o traxe da Unión Europea. Os miles de inmigrantes aglomerados na localidade francesa Calais, á espera de dar o salto ao Reino Unido a través do Eurotúnel, tensou as relacións entre os dous países, azuzados polos seus respectivos medios de comunicación. Onte, os ministros de Interior francés e británico, intentaron saír ao paso cunha carta conxunta na que aseguran que «pór fin a esta situación é unha prioridade absoluta; os nosos dous gobernos están determinados a conseguilo, e a conseguilo xuntos», afirman o galo Bernard Cazeneuve e a inglesa Theresa May. E para resolver a crise apelan á unidade de todos os membros da Unión Europea, que aínda non se repuxo da fractura interna causada hai só unhas semanas pola disputa para fixar cotas de asilados por países ante a chegada en masa de inmigrantes e refuxiados ás costas italianas.
Cameron «fai política»
Aqueles enfrontamentos deixaron feridas que a crise de Calais reabriu. Foi o ministro de Xustiza sueco, Morgan Johansson, o encargado de meter o dedo na chaga. En declaracións a BBC Radio, cargou directamente contra o primeiro ministro británico, David Cameron, a quen acusou de non facer todo o que pode neste terreo e de aproveitar o sucedido en Calais para «facer política» interna de forma pouco construtiva. Johansson sinalou que o seu país admite semanalmente unha media de 1.200 solicitantes de asilo mentres que o Reino Unido negouse a participar no programa europeo de acollida. «Vexo un país que non quere asumir a responsabilidade que debería», manifestou o ministro sueco, quen acusou a Cameron de «intentar dividir á xente» por empregar termos como «infesta» ou «inmigrantes ilegais», «e iso non é construtivo».
Alleos a esta andanada, Francia e Reino Unido sinalaron onte que a crise de Calais non é un asunto exclusivo de ambos os países, polo que instaron á UE a abordar a raíz do problema. «Moitos ven Europa, e en particular o Reino Unido, como un destino que ofrece a perspectiva de ganancias económicas; este non é o caso, as nosas rúas non están asfaltadas de ouro», afirma Cazeneuve e May na súa carta, na que instan á UE a «romper o nexo entre cruzar o Mediterráneo e conseguir residencia en Europa por razóns económicas».
