(29/07/2015)
Os alumnos de Escolas Abertas rematan a súa formación en Galicia cun festival musical
Universalidade
Participantes no curso de Escolas Abertas na súa edición de 2015, tras a clausura.
I.B. 29/07/2015
O secretario xeral de Emigración, Antonio Rodríguez Miranda, clausurou no Círculo das Artes de Lugo a edición do programa Escolas Abertas deste ano. No acto tamén estiveron presentes o delegado da Xunta de Galicia en Arxentina e Uruguai, Alejandro López Dobarro, e o xefe territorial da Consellería de Traballo e Benestar en Lugo, Alberto Linares.
A iniciativa desenvolveuse durante esta segunda quincena de xullo en diversos enclaves galegos, tendo como punto de concentración e aloxamento o albergue Lug II, dependente da Dirección Xeral de Xuventude, da Consellería de Trabajo e Benestar.
Este ano participaron no programa Escolas Abertas un total de 83 alumno: 70 procedentes de Iberoamérica, 7 doutros países europeos distintos de España, e 6 de comunidades autónomas españolas distintas de Galicia. Os cursos da edición deste ano consistiron en talleres de especialización de gaita, baile e percusión tradicional galega, canto popular e pandeireta, e confección de traxe tradicional galego.
Escolas Abertas pretende dar a coñecer a cultura, modo de vida e actualidade de Galicia por todo o mundo a través da convivencia e estanza de mozos que transmitirán a súa experiencia propia a moitos outros nos seus lugares de orixe ou residencia habitual, mediante o efecto multiplicador dos cursos formativos. O obxectivo do programa é dar a coñecer entre os mozos da diáspora a Galicia actual, a través dos ollos doutros mozos da emigración.
Os alumnos deste programa son, á súa vez, formadores nos lugares dos que proceden, polo que os seus coñecementos, e tamén a súa experiencia de contacto directo coa realidade actual do país, chega así aos cidadáns da Galicia do Exterior. Coa instrución e mellora de habilidades dos participantes na iniciativa, acrecéntase o interese e a formación de millares de galegos residentes, e mesmo nacidos, fóra da Galicia territorial.
Na súa alocución aos presentes, Rodríguez Miranda exaltou o fortalecemento da Galeguidade universal que están a levar a cabo moitos centros e casas de Galicia mediante a posta ao día e ampliación da súa carteira de servizos. Sodes embaixadores da cultura galega nos centros e países nos que residides, unhas mans colaboradoras sen as cales a universalidade de Galicia quedaría manca".
Os propios Miranda, Dobarro e Liñares foron os encargados de entregar a súa respectiva certificación aos participantes na edición deste ano, nun acto que concluíu coa posta en común do moito aprendido estes días. O colofón estivo a cargo dos propios alumnos con respectivas actuacións das distintas disciplinas nas que foron formados.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas