(02/07/2015)
Máis de 400 mozos lograron, desde novembro, visado para estudar e traballar en Australia
Máis de 400 mozos españois obtiveron visado para estudar e traballar en Australia, desde novembro.
A Rexión Internacional 01/07/2015
Máis de 400 mozos españois obtiveron visado para estudar e traballar en Australia desde que o pasado mes de novembro entrase en vigor o Programa de Mobilidade subscrito entre ambos os países en setembro. A segunda fase do programa prevé conceder outros 500 visados máis, que poden solicitarse a partir deste mércores 1 de xullo.
Segundo datos facilitados pola embaixada de España en Australia, neste mesmo período obtiveron visado para estudar e traballar en España unha ducia de australianos.
O convenio entre ambos os estados contempla a posibilidade de expedir até 500 visados para cidadáns de cada un dos países co obxectivo de facilitar o coñecemento e a comprensión mutuos mediante o incremento de oportunidades para os mozos españois e australianos, gozando de períodos de estancia, que inclúan vacacións, estudos e experiencia laboral.
Información na rede
Pola súa banda, a organización Aussie You Too anunciou que, ante a renovación feita por ambos os países, organizará esta xornada unha charla online para informar os detalles do proceso de aplicación.
O programa de visados está dirixido a profesionais entre 18 e 30 anos. Entre os requisitos que deben cumprir os solicitantes atópase a esixencia de polo menos dous anos en educación superior, bo manexo do idioma, non ter nenos ao seu cargo, ou contar con diñeiro suficiente para sufragar a súa manutención.
No aspecto educativo, os que participen no programa poderán matricularse nun ou máis cursos educativos ou de formación que non excedan de catro meses de duración.
O permiso laboral obtido para traballar en cada país non poderá ser superior aos 12 meses, independentemente da situación nacional de emprego, e os beneficiarios non poderán traballar para o mesmo empleador máis de seis meses durante a súa estancia, a menos que conten con autorización expresa do país anfitrión.
Finalmente, ambos os estados resérvanse o dereito de rexeitar calquera solicitude, denegar a entrada no seu territorio ou deportar por incumprimento das súas leis. Ademais, calquera das partes pode terminar o convenio en calquera momento con tres meses de antelación por motivos de seguridade pública, orde pública, saúde pública ou risco de inmigración.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas