GALEGO | ESPAÑOL

PORTAL DA INMIGRACION NOS CONCELLOS DE GALICIA
ObxectivosIntegraciónFerramentas
-LexislaciónOrganismos-

Francia e Alemaña piden cambios para aceptar as cotas de refuxiados

(01/06/2015)

Francia e Alemaña piden cambios para aceptar as cotas de refuxiados


Ambos os dous países esixen valorar máis os esforzos anteriores en atención a asilados



Lucía Abellán Bruselas 1 XUÑO 2015 -







Inmigrantes desembarcados nas costas de Almería por Salvamento Marítimo, este fin de semana. / Carlos Barba (EFE)




Francia e Alemaña deron hoxe un simbólico respaldo político á proposta dunha repartición máis homoxénea de refuxiados na Unión Europea. Os dous Gobernos decláranse "dispostos a examinar a proposta da Comisión Europea", aínda que piden cambios no modelo de distribución -as chamadas cotas- que presentou a semana pasada o Executivo comunitario. Tras o rexeitamento inicial de Francia, España, Hungría, Polonia e os bálticos, a iniciativa francoalemana abre a porta a un compromiso europeo para aliviar -polo menos temporalmente- a acumulación de demandantes de asilo en poucos países (o 72% pide asilo en catro Estados).

Os ministros do Interior de Francia e Alemaña divulgaron un comunicado conxunto esta mañá, poucos días despois de diverxer nas súas reaccións iniciais á repartición proposta por Bruxelas. Berlín avalouno de inmediato, mentres París se mostrou contrario ás cotas. Os ministros de ambos os dous países adoptan agora unha vía intermedia. "Este mecanismo de recolocación temporal debe fundarse en dous principios de igual importancia: a responsabilidade e a solidariedade. Cremos que, na proposta presentada pola Comisión, aínda non se alcanzou o equilibrio entre eses dous principios", asegura o documento.

 

 

A proposta comunitaria propoñía recolocar 40.000 demandantes de asilo sirio e eritreos dos desembarcados en Italia e Grecia, os países con máis presión migratoria do Mediterráneo, nos próximos dous anos. Para iso, Bruxelas establecía unhas cotas de repartición baseadas no PIB, a poboación, o desemprego e os esforzos realizados ata agora para atender a eses refuxiados. Os ministros piden que, entre esas catro variables, "se teñan máis en conta os esforzos efectuados polos Estados membros" en protección internacional e outras formas de asistencia aos emigrantes.

O comunicado francoalemán inclúe tamén unha novidade que pode resultar controvertida. Trátase de anular, "en caso de necesidade imperiosa", o mecanismo que permite aos cidadáns dos Balcáns viaxar sen visado á UE. Ese réxime, introducido en 2013, xa prevé unha cláusula de suspensión en caso de afluencia masiva, pero os ministros do Interior queren agora subliñalo dado o elevado número de chegadas rexistradas nos últimos meses procedentes dos Balcáns.

Máis alá deste aspecto, os ministros non fan senón resaltar varios elementos que xa inclúe a proposta da Comisión: que o mecanismo de distribución sexa "temporal e excepcional", que só unha parte dos demandantes de asilo se recoloquen e o resto se rexistren no primeiro país europeo de chegada, como dita a lei, e que os estranxeiros sen dereito a reclamar protección sexan devoltos aos seus países de orixe ou a Estados cos que existan acordos de retorno.

Máis alá da nova postura francoalemana, outros países tamén se están a resituar na dirección de lograr un pacto. Co fluxo continuo de chegadas -Italia rescatou 4.500 persoas en poucas horas durante o fin de semana-, os xefes de Estado e de Goberno non queren dar a sensación de que rexeitan mitigar os efectos deste fenómeno por non querer acoller uns cantos miles de potenciais refuxiados. Tamén España está disposta a aceptar un compromiso europeo sobre a base do plan da Comisión se se introducen algúns cambios sobre o sistema de cotas.

 

 

Os expertos do Consello Europeo analizarán alternativas esta mesma semana, que deberán ser estudadas polos ministros do Interior o 15 de xuño e, de forma máis determinante, polos xefes de Estado e de Goberno no cumio do 25 de xuño.



 

 

Novas e Actualidade


Titulares
Histórico


 ACTIVIDADES

Decembro 2019
LMMeXVSD
1234567
891011121314
15161718192021
22232425262728
293031    
       



 AREA DE TÉCNICOS

 Usuario:
 Contrasinal:
 

 
¿Olvidou o seu contrasinal? | Alta

OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO

(c) 2009 FEGAMP, Federación Galega de Municipios e Provincias :: Texto legal
FEGAMPinmigracion@fegamp.es
Xunta de Galicia

Desarrolo: AVA Soluciones Tecnológicas