Tocada e case afundida. A Comisión Europea perdeu toda esperanza de que saia adiante a súa proposta de cotas para a repartición e acollida de refuxiados nos países membros da UE. A oposición feroz de España, Hungría, República Checa, Estonia , Letonia, Lituania, Eslovaquia e Polonia puxo a Bruxelas contra as cordas no último Consello de Ministros de Exteriores. O firme rexeito de Francia selou a defunción da iniciativa. «As cotas no dereito ao asilo non teñen sentido», criticou onte abertamente o presidente francés, François Hollande, na súa visita a Berlín, onde se reuniu coa chanceler alemá, Angela Merkel. O Reino Unido, Irlanda e Dinamarca están exentos de participar, segundo os tratados.
O líder do Executivo comunitario, Jean Claude Juncker, non poderá sacar adiante o seu plan sen a aprobación dunha maioría cualificada do Consello, e moito menos sen o apoio político de Francia, a segunda potencia da UE e un dos cinco países que absorbe ao 75 % total dos asilados no seu territorio. «O criterio de asignación pode ser discutido cos Estados membro», recoñeceu onte a portavoz comunitaria, Natasha Bertrand, consciente de que a proposta está morta.
Bruxelas asume que deberá presentar unha nova fórmula para redistribuír a cota de repartición de refuxiados que satisfaga a Alemaña e Suecia, quen acollen ao 44 % asilados do total na UE, á vez que conflúa coas expectativas do resto de socios europeos. O que está claro é que a proposta final será menos ambiciosa que a inicial.
Advertencia de España
Mentres tanto, Hollande e Merkel traballan xa pola súa conta para desenvolver un sistema de repartición alternativa. España advirte de que se deberán ponderar mellor os criterios para o establecemento de cotas e ter en conta o peso da inmigración económica para contar coa súa visto e prace. Bruxelas outorgou un 40 % do peso das cotas ao Produto Interior Bruto (PIB), un 40 % ao total de poboación e só un 10 % á cifra de desemprego e outro 10 % ao esforzo de acollida en anos previos.
Moito máis vehemente foi onte o líder húngaro, Víktor Orbán, quen cualificou de «tolemia» a proposta da Comisión Europea. «O sistema de cotas é un chamamento a traficantes e inmigrantes», asegurou antes de instar á Unión Europa a «resolver o problema fóra de Europa, non dentro». «Hai que devolver aos inmigrantes ou facer que non abandonen os seus países», manifestou sen facer alusión algunha ao dereito á demanda de asilo á que se poden acoller todas as persoas que son rescatadas do mar.
A próxima semana Bruxelas deberá presentar a proposta lexislativa para distribuír aos refuxiados. Con cotas ou sen elas, a polémica seguirá acendida nas capitais europeas.
Filipinas acollerá aos rohingyas
Filipinas converteuse onte no primeiro país asiático en ofrecer acubillo aos miles de rohingyas que están á deriva no mar, ante a negativa de Tailandia, Malaisia e Indonesia a acollelos. A negativa é tal que o Exército indonesio ordenou aos pescadores que non axuden aos refuxiados «a non ser que se estean afogando». Sobreviventes acollidos en Aceh conta que unha pelexa pola escaseza de auga e comida nun barco saldouse con cen mortos.
