(29/04/2015)
Máis dun millón de inmigrantes nacionalízanse dende 2003, "pese" á difícil normativa
Un total de 1.109.322 inmigrantes residentes en España obtiveron a nacionalidade española entre 2003 e 2014.
A Rexión Internacional 29/04/2015
Un total de 1.109.322 inmigrantes residentes en España obtiveron a nacionalidade española entre 2003 e 2014, malia a complexidade e os tempos de espera disuasorios, segundo un estudo coordinado polo Centro de Estudos e Documentación Internacional de Barcelona (CIDOB).
Segundo este informe, que se presentará mañá en Madrid, España, Alemaña, Francia e Reino Unido son os países con máis naturalizacións, malia que conta con "un sistema de acceso á nacionalidade complexo que en moitas ocasións disuade os inmigrantes".
A investigación titulada "Diferenciación na naturalización dos inmigrantes en España (DNIs) ", coordinado polo CIDOB, co apoio da Fundación Ortega-Marañón, e cofinanciado polo Open Society Foundations, analizou os efectos da política de naturalización en España e dos mecanismos polos que o procedemento crea diferenzas tanto entre colectivos de inmigrantes.
O informe destaca que é "especialmente significativo" o ano 2013, que se corresponde co Plan Intensivo de Nacionalidade, no que as naturalizacións concedidas alcanzaron as 261.295.
Aumentaron as denegacións
O estudo denuncia que tamén aumentaron o número de denegacións, que foron 94.109 nos últimos tres anos (31.449 o 2014).
Segundo os autores do estudo, mentres que en 2012 non se aceptaban o 11,6% das solicitudes, en 2014 chegouse ao 37,8% de denegacións.
Por orixes
O estudo recorda que os nacionais de orixe de países iberoamericanos, Andorra, Filipinas, Guinea Ecuatorial, Portugal ou procedentes de sefardís só necesitan dous anos para poder pedir a nacionalidade por residencia, mentres que os outros inmigrantes deben residir de forma legal e continuada durante 10 anos para poder optar á nacionalidade española.
Segundo o informe do Valedor do pobo de 2014, o procedemento para obter a nacionalización "pode oscilar dun e medio a dez anos, dependendo do lugar de residencia".
Motivos
"As razóns polas que se están a naturalizar os inmigrantes son mixtas, pero destacan unha combinación de motivacións subxectivas e utilitarias, nas que o contexto da crise económica ten particular relevancia", segundo os autores, que consideran "importante" saber os motivos polos que os inmigrantes non se naturalizan.
Entre estes motivos figuran causas que son consecuencia directa da lexislación que, por exemplo, non permite a dobre nacionalidade, e do procedemento, é dicir, os longos anos de espera e as disparidades nos rexistros civís ou "a discrecionalidade das autoridades para medir a boa conduta cívica e a integración" que, segundo os autores, "crean unha situación arbitraria e de indefensión xurídica".
O estudo pide "unha narrativa sobre a naturalización e dunha Lei de Nacionalidade precisa e clara que elimine as diferenzas detectadas entre os rexistros civís", que van dende os documentos que entregar, as probas que realizar (en particular para medir a integración), ata o procedemento da tramitación en si (tempo de espera).
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas