(18/03/2015)
Europol pon en marcha un equipo operativo contra a inmigración irregular no Mediterráneo
O órgano de coordinación policial da UE, Europol, puxo en marcha este martes un equipo operativo conxunto, bautizado como Mare, cuxo obxectivo é combater os grupos de delincuencia organizada que están a facilitar as viaxes en barco de inmigrantes no Mediterráneo para que entren de forma irregular na UE.
EUROPA PRESS
- BRUXELAS
17/03/2015
O novo equipo operativo combinará os recursos de Europol en materia de intelixencia coas capacidades dos Estados membros para levar a cabo operacións coordinadas contra estas redes de facilitadores. Mare reforzará ademais a cooperación entre Europol, Frontex, Interpol e os Estados membros.
"As traxedias migratorias que vimos no mar esixen unha acción rápida e coordinada a nivel da UE. O lanzamento do equipo operativo Mare non podía ser máis oportuno", dixo o director de Europol, Rob Wainwright, nun comunicado.
"Europol e os nosos socios concedemos unha grande importancia á loita contra os grupos criminais que facilitan a inmigración ilegal e combinaremos todos os recursos dispoñibles para dar unha resposta proactiva das forzas de seguridade", resaltou.
"Este centro de intelixencia marítima, albergado e apoiado por Europol, ten un gran potencial. Reforzará as nosas actuacións contra os traficantes de seres humanos, contra os criminais sen escrúpulos que facilitan a inmigración irregual cara a Europa a través do Mediterráneo," apuntou pola súa banda o comisario de Inmigración, Dimitris Avramopoulos.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas