A emigración xuvenil custará ao Estado 57.000 millóns de euros se continúa o actual desemprego

(13/02/2015)

A emigración xuvenil custará ao Estado 57.000 millóns de euros se continúa o actual desemprego

-Segundo os cálculos dun informe do Consello da Xuventude de España
-España ten o segundo paro xuvenil máis alto da Unión Europea
-Desde 2009, 218.000 mozos deixaron o país pola falta de emprego

Un informe do Consello de Xuventude de España estima que o custo da emigración xuvenil en dez anos serán 57.000 millóns de euros. EFE

 RTVE.es/AGENCIAS 12.02.2015

A emigración xuvenil, se se manteñen as actuais cifras de desemprego durante os próximos dez anos, supoñería para o Estado un custo de 57.000 millóns de euros, cantidade referente á falta de recadación de impostos e ao investimento realizado na educación de todos aqueles que abandonen o país.

Estas son as cifras que bota o informe "Xuventude Necesaria", elaborado polo Consello da Xuventude de España (CJE), no que se sinala que se a situación continúa invariable, o desemprego, a emigración e a emancipación tardía dos mozos repercutirá a longo prazo de forma negativa sobre o conxunto de poboación española.

Para os sociólogos Daniel Sorando e Stefano de Marco, autores do informe, este colectivo é un dos sectores máis afectados pola actual crise económica, porque malia contar cun nivel educativo maior ao da xeración anterior, as cifras de paro xuvenil son as segundas máis altas da Unión Europea.

A emigración, unha das principais alternativas para os mozos
Segundo os últimos datos da Enquisa de Poboación Activa (EPA), o paro entre a poboación de 16 a 24 anos ascendía ao 51,80%, 813.000 desempregados, máis do dobre da taxa xeral (23,7%).

Por iso, estes sociólogos apuntan que a emigración é unha das principais alternativas dos mozos en España: segundo datos do Instituto da Xuventude, dende 2009, son 218.000 os que deixaron o país.

No peor dos escenarios, segundo os cálculos do estudo, en 2024, España perdería o equivalente ao 3,4% do PIB a niveis de 2013 en investimento de educación non aproveitada e ao mesmo tempo deixaría de recadar impostos pola falta deses mozos por un equivalente ao 2,2% do PIB de 2013.

Consecuencias a nivel demográfico
Ademais das consecuencias económicas, o documento estima o impacto a nivel demográfico dos actuais niveis de desemprego xuvenil e confirma o efecto restritivo sobre a taxa de natalidade. Se continúan o paro, a emancipación tardía, as dificultades de acceso á vivenda e o subdesenvolvemento do Estado de benestar, "a intensidade da fecundidade española sería ínfima".

Estes feitos poden influír de forma alarmante, porque a taxa de natalidade española xa é unha das máis baixas da Unión Europea, con 1,31 fillos por muller, o que terá repercusións no sistema de pensións.