Inmigración. Goberno e pp perfeccionan no senado a cobertura xurídica do rexeitamento en fronteira

(11/02/2015)

Inmigración. Goberno e pp perfeccionan no senado a cobertura xurídica do rexeitamento en fronteira

lainformacion.com

martes, 10/02/15

O ministro do Interior, Jorge Fernández Díaz, anunciou hoxe no Senado que o PP vai introducir algunhas melloras na emenda á Lei de Seguridade Cidadá que vén a regularizar o chamado rexeitamento en fronteira ou devolucións en quente nas fronteiras de Ceuta e Melilla.
A este respecto, Fernández Díaz, tras participar no pleno da Cámara Alta, explicou aos xornalistas que este martes finalizaba o prazo de emendas á Lei de Seguridade Cidadá.
Neste sentido, referiuse a que a maioría das emendas a esta futura lei son de "precisión técnica ou xurídica", aínda que explicou que a referida ao rexeitamento en fronteira vai ser mellorada polo PP para eliminar as "dúbidas" que algúns formularan.

DEREITOS HUMANOS
Precisou que os populares incluirán varios parágrafos máis nesta emenda, co fin de "facer explícito algo que é implícito", no sentido de que a actuación da Garda Civil nas fronteiras de Ceuta e Melilla se fai "con pleno respecto aos dereitos humanos e todos os convenios internacionais dos que España forma parte".
Ademais, incluirase nesta emenda que as solicitudes de asilo nas cidades españolas do norte de África "se tramitarán conforme aos procedementos internacionais que están previstos", para o cal Interior inaugurará proximamente unhas oficinas específicas.
Ao mesmo tempo, farase referencia a un "protocolo de actuación" das Forzas de Seguridade do Estado nos valos de Ceuta e Melilla. O ministro remarcou que se trata de "dar máis precisión e seguridade xurídica" ao rexeitamento en fronteira, do que dixo que vén sendo aplicado pola Garda Civil nestas cidades dende 2005.