(06/02/2015)
Exteriores explica en infografía como votar dende o estranxeiro nas municipais e autonómicas
O gráfico de Exteriores intenta resolver as dúbidas á hora de votar, dos españois residentes fóra de España.
A Rexión Internacional 05/02/2015
O Ministerio de Asuntos Exteriores e de Cooperación elaborou unha infografía no seu sitio web (www.exteriores.gob.es) para explicar aos cidadáns españois que pasos teñen que dar se van votar dende o estranxeiro nas próximas eleccións municipais e autonómicas, que se celebrarán nos meses de marzo e maio.
Aquelas persoas que estean de paso no estranxeiro nesas datas (22 de marzo e 24 de maio) poderán votar nos dous procesos electorais, pero os residentes no exterior só teñen dereito a participar nas autonómicas.
No caso dos primeiros, deberán comunicar o seu desexo de votar dende o estranxeiro antes do próximo 21 de febreiro, para as eleccións ao Parlamento de Andalucía, e antes do 25 de abril para os comicios municipais e as autonómicas en Aragón, Asturias, Baleares, Canarias, Cantabria, Castela-A Mancha, Castela e León, Extremadura, La Rioja, Madrid, Murcia, Navarra, Comunidade Valenciana, Ceuta e Melilla.
Os pasos que teñen que seguir son rexistrarse como "non residentes" na Oficina Consular máis próxima e encher o impreso de solicitude da documentación electoral que pode descargarse na web de Exteriores ou en www.infoelectoral.interior.es.
Cando lle chegue a documentación electoral ao seu domicilio temporal no estranxeiro, deberá remitirá o sobre correspondente por correo certificado á Mesa electoral ata o día 18 de marzo (inclusive), para as eleccións ao Parlamento de Andalucía, e ata o 20 de maio para as municipais e autonómicas.
Inscrición no CERA
No caso dos residentes permanentes no estranxeiro, poderán votar nas eleccións autonómicas se figuran inscritos no Censo de Españois Residentes Ausentes (CERA) antes do 1 de novembro
de 2014, (para as eleccións andaluzas) e de forma previa ao 1 de xaneiro de 2015 para o resto dos comicios de maio.
A Oficina do Censo Electoral enviará de oficio o impreso de solicitude de documentación electoral aos electores incluídos no CERA, se ben este impreso se pode descargar nas páxinas web dos Ministerios de Exteriores e Interior, ou pedilo nas oficinas consulares.
Ese impreso, debidamente cumprido e acompañado de fotocopia de pasaporte ou DNI, terá que remitirse á correspondente Delegación
Provincial da Oficina do Censo Electoral, que posteriormente remitirá á dirección do elector a documentación para que poida votar e unha folla informativa coas instrucións para facelo por correo ou depositando o seu voto en urna na súa oficina consular.
O Ministerio de Exteriores tamén colgou na súa web un folleto informativo coas dúbidas máis frecuentes que poden xurdir aos cidadáns que votan dende o estranxeiro.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas