(06/02/2015)
A Asociación de Retornados do Ulla-Umia traslada as súas xornadas sobre pensións ao Salnés
I.B. 06/02/2015
A asociación de emigrantes retornados Ulla-Umia continúa co ciclo de reunións co fin de informar a todos os afectados polo proceso aberto para a regularización no IRPF de pensións pagadas dende o estranxeiro así como para poder solicitar a condonación de intereses, sancións e recargas. Despois de dúas semanas percorrendo os concellos da bisbarra Ulla-Umia, e do Deza para a próxima semana empezarase na bisbarra do Salnés.
Dende a Asociación de Emigrantes Retornados Ulla-Umia destácase que "con estas reunións se pretende que todos os veciños teñan a información necesaria para poder solicitar as sancións e intereses pagados pola non inclusión na declaración da renda de pensións cobradas do estranxeiro, así como informalo dos pasos a seguir se nunca se incluíron as devanditas pensións na declaración da renda".
Para facilitarlles os trámites aos retornados, a Asociación asinou un convenio de colaboración coa AEAT o pasado mércores día 21 na Delegación Especial da Axencia Tributaria en Galicia.
As charlas terán lugar os próximos 10 e 12 de febreiro. O 10 de febreiro, a AERU estará presente no Edificio de Usos Múltiples de Portonovo, ás 19,00 horas.
A cita trasladarase o día 12 de febreiro ao Centro Comarcal Exposalnés, en Cambados, ás 20,00 horas.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas