Un traballo documental sobre a emigración estrea as residencias técnicas do Colón

(28/01/2015)

Un traballo documental sobre a emigración estrea as residencias técnicas do Colón

A Opinión  28-01-2015
Redacción | a coruña

O teatro Colón acollerá o próximo fin de semana o proxecto Balor na acción dunha cadeira, de Artesa Cía, a primeira residencia técnica deste espazo cultural da cidade. Este traballo documental arredor da emigración realizouse a partir da figura do bisavó de Roi Fernández, director da obra, que mestura ficción con realidade nunha videocreación.

A trama conta a historia duns galegos emigrados dende unha aldea de Sada a Nova York a comezos do século XX. En contacto con esa cultura comezaron a ter inquietudes culturais e educativas que os transformaron e acabaron fundando unha escola laica en Sada.

Tras un longo proceso de ensaios e anos de documentación, Artesa Cía estrea esta proposta que Roi Fernández definiu como "unha experiencia de cine en directo, na que se mesturan varias capas de narración para contar unha historia que aquí ten uns nomes propios pero que é universal," sostén nunha nota o teatro. Conforman a repartición os actores Laura Villaverde, Simón Piñón e Gustavo Fouce.