Unha oenegé alemá ofrece formación e traballo a mozos galegos que estean no paro

(16/01/2015)

Unha oenegé alemá ofrece formación e traballo a mozos galegos que estean no paro

Os candidatos deben carecer de estudos universitarios ou de FPe, antes de viaxar a Colonia, recibirán un curso de idiomas

Escrito por:
Ana Lorenzo
A CORUÑA / A VOZ 16 de xaneiro de 2015

Alemaña quere axudar a rematar coa alta taxa de desemprego xuvenil en Galicia, e por este motivo, unha oenegé xermana fixouse na comunidade para poñer en marcha un dos seus proxectos máis ambiciosos: ofrecer aos mozos galegos a oportunidade de matricularse nun ciclo de FP Dual, que combina as horas de formación académica cunha xornada laboral nunha empresa da rama profesional elixida, co que os alumnos seleccionados terían un soldo dende o primeiro día. O Centro Alemán Mein Deutschzrntrum da Coruña foi a entidade elixida pola oenegé Sozialwerk Dürener Christen para poñer en marcha o proxecto MobiPro-EU (Formación sen Fronteiras), que ten previsto seleccionar a un máximo de 17 mozos de entre 18 e 27 anos, que deberían cumprir ademais outros tres requisitos: ser cidadáns da Unión Europea, ter residencia en España, e dispoñer unicamente de formación básica (ESO).



Esta última condición é moi importante, posto que o que buscan nesta oenegé é axudar a mozos que non dispoñan de ningún título universitario nin de formación profesional. Ademais, tamén se considera unha vantaxe importante se os candidatos teñen algún coñecemento de alemán, aínda que no caso contrario se lles formaría gratuitamente. Segundo explicou Mathias Wiewiorra, do Centro Alemán coruñés, «os alumnos recibirán un curso de alemán para obter un nivel B1 do idioma. Serían tres ou catro meses, unhas 400 horas, para conseguir un nivel básico e son totalmente gratuítas», apuntou.

Oportunidade única

Os candidatos que finalmente resulten seleccionados poderán realizar a súa formación dual nas ramas profesionais de informática, electrónica, mecatrónica e automoción, e hostalaría, cuxas clases e prácticas se desenvolverán en centros e empresas da rexión alemá de Colonia. Para Mathias Wiewiorra esta «é unha oportunidade única para os mozos galegos que nin estudan nin traballan». Tamén asegura que o proxecto conta con todas as garantías, xa que se trata dunha oenegé avalada polo Goberno alemán. A todo iso se une que a responsable do proxecto en España é galega. Segundo confesou Elisa Fernández, «escollemos Galicia como rexión de enfoque para o noso programa pola alta taxa de desemprego xuvenil. Ademais, foi unha decisión conxunta levalo a Galicia, posto que o meu xefe ten predilección por Galicia, e eu, como parte española do proxecto, son galega e estou moi orgullosa de ofrecerlles esta posibilidade aos mozos da miña terra,».