Os dous estiveron emigrados en Suíza. Nesa terra sobreviñéronlles distintas enfermidades e acabaron xubilándose por culpa das súas patoloxías. En ambos os casos, soamente teñen eloxios para a Administración e a sanidade do país ao que emigraron. Con todo, cando se lles pregunta por España, a cousa cambia. «Aquí non hai maneira, a burocracia é terrible. No meu caso alí son inválido total, porque teño un bo número de enfermidades. Sen embargo aquí déronme o 27%, así que teño que tributar pola pensión que cobro do estranxeiro. Hai detalles que te matan, dixéronme que non me recoñecían nada porque non entendían o francés dos meus papeis, pedín a Suíza a tradución e mandárona en dous días, e aínda así nada de nada, sigo igual», sinala Benito Villaverde. Logo, José Trillo remacha: «Aos que din que aquí hai boa sanidade dígolles que vaian a Suíza».