A inclusión de Gómez na candidatura dábase como segura, xa que ocupa a presidencia dos Verdes na cidade. No entanto, tiña que superar o filtro dos órganos da formación, que deron o visto e prace a semana pasada. O feito de aparecer como segundo cabeza de lista ten importancia política, xa que nas eleccións non hai orde, senón que os electores elixen a quen queren das opcións que lles dan, e na papeleta aparecen por orde alfabética dos seus apelidos. Cunha excepción: os tres primeiros, para destacar a súa relevancia.

A primeira no cartel será unha concelleira no grupo de goberno, e o terceiro, o responsable do grupo municipal. Nos comicios do anos 2011, Alfonso concorreu no sétimo posto. Non entrou de xeito directo, senón que o fixo hai un ano xusto tras a saída dun compañeiro.

Alfonso, director adxunto do Conservatorio Popular de Música, Danza e Teatro de Xenebra, non é o único candidato á reelección da zona: tamén Javier Brandón orixinario de Carballo e Cerceda, polos socialistas.