Chegan a Galicia os 134 participantes no programa 'Reencontros na terra 2014'

(03/10/2014)

Chegan a Galicia os 134 participantes no programa 'Reencontros na terra 2014'

Proceden de Arxentina, Uruguai, Brasil, Venezuela e Cuba

E.E. Venres, 03 de Outubro de 2014.





Chegada dos participantes en Reencontros na terra ao aeroporto de Lavacolla.




A primeira quincena benefícianse dunha estanza na Residencia do Carballiño e, despois, poden quedar coas súas familias ata un máximo de tres meses. A maioría das persoas participantes proceden de Arxentina e Uruguai, países que concentran case a metade de galegos residentes no estranxeiro.



As persoas participantes no programa 'Reencontros na terra', na súa edición deste ano 2014, aterraron o venres 3 de outubro nos aeroportos de Lavacolla e Peiteador, en voos procedentes de Arxentina, Brasil, Cuba, Uruguai e Venezuela, tras escala en Madrid.

O programa 'Reencontros na terra', organizado pola Secretaría Xeral dá Emigración e desenvolvido coa colaboración da Consellería de Traballo e Benestar, ten por finalidade favorecer o achegamento de emigrantes galegos que cumprisen 65 anos á súa terra e ás súas familias. Participan nesta edición un total de 134 persoas procedentes dos cinco países citados.

75 anos de media

Aínda que todas as persoas participantes cumpriron os 65 anos, a idade media supera amplamente esta cifra, xa que se aproxima aos 75 anos. As catro de maior idade son todas procedentes de Arxentina, destacando unha persoa que conta con 89 anos.

Os grupos máis numerosos son os procedentes de Arxentina (80 persoas) e Uruguai (36 persoas). O resto das persoas participantes son 11 de Brasil, 4 de Venezuela e 3 de Cuba. Preto do 32% naceron na provincia de Pontevedra, o 31% na da Coruña, o 21% na de Ourense e o 16% restante na provincia de Lugo.

O proceso

A finalidade desta iniciativa da Xunta é que as persoas participantes redescubran as súas raíces, tanto de tipo cultural, social, gastronómico ou folclórico, coma sobre todo familiar, poñéndose en contacto coa realidade do seu país de orixe e propiciando actividades que posibiliten o coñecemento da Galicia actual, o encontro coas súas propias familias e o intercambio de experiencias.

As solicitudes -cuxo prazo de presentación rematou o pasado 16 de xullo- foron avaliadas seguindo os criterios de percepción da pensión asistencial por ancianidade do Estado español para o ano 2014 e a idade de quen realizou a solicitude, segundo o baremo descrito na correspondente convocatoria publicada no Diario Oficial de Galicia (DOG).

Para informar sobre as cuestións relativas o programa leváronse a cabo reunións previas nos diferentes países de orixe nas que participaron as persoas beneficiarias e nas que interveu persoal das delegacións da Xunta ou, no seu caso, das entidades colaboradoras; o persoal médico acompañante no relativo aos temas de coidado da saúde (en Arxentina e Uruguai, e persoal designado pola axencia de viaxes adxudicataria do concurso público convocado para os desprazamentos, no tocante aos asuntos de embarque, conexións, pasaxes, etcétera.

A estanza

O programa desenvólvese ao longo de tres meses, con dúas fases diferenciadas. A primeira delas consiste nunha estanza de dúas semanas, na Residencia de Tempo Libre do Carballiño, en réxime de pensión completa, levando a cabo actividades recreativas e culturais acomodadas ás persoas participantes, e con excursións, en transporte colectivo, a distintos lugares da Comunidade Autónoma para un mellor coñecemento da Galicia de hoxe en día, entre os que destaca unha visita a Santiago de Compostela con percorrido pola cidade monumental e recepción institucional.

A segunda fase consiste nunha estanza xunto as súas familias de Galicia, coas que poden permanecer ata completar un tempo máximo de tres meses. Supón para moitas das persoas beneficiarias unha oportunidade única de volver encontrar as súas raíces persoais e redescubrir os lazos familiares deixados atrás.