Máis 136.000 españois emigraron nos dous últimos anos

(26/09/2014)

Máis 136.000 españois emigraron nos dous últimos anos

lainformacion.com

xoves, 25/09/14 -



Máis de 136.000 españois emigraron en 2012 e 2013, segundo os datos remitidos polo Goberno ao Congreso dos Deputados. En concreto, en 2012 un total 57.267 persoas marcharon fóra do país e o ano pasado foron 79.306 os que buscaron outro país de residencia.
Así se desprende dunha resposta parlamentaria do Executivo ao deputado do PSOE Miguel Ángel Heredia, a cuxo contido tivo acceso Servimedia. En concreto, foron 136.573 cidadáns de nacionalidade española os que emigraron nos últimos dous anos dos que se teñen rexistros. Non obstante, na súa resposta parlamentaria, o Executivo non especifica os motivos específicos que levaron a que se produzan estes movementos migratorios.
Analizado por autonomías, a Comunidade de Madrid é a que máis emigrantes tivo nos dous últimos anos. No ano 2012, abandonaron esta comunidade 14.173 persoas e en 2013 19.369. Isto suma un total de 33.569 saídas dende a comunidade madrileña.

53 MADRILEÑOS EMIGRAN AO DÍA
Se se ten en conta que a comunidade que preside Ignacio González ten unha poboación de ao redor de 6,5 millóns, isto supón que un 0,5% do total dos madrileños se foron a vivir ao estranxeiro e que o pasado ano emigraron de media 53 madrileños ao día.
Tamén é significativo o caso de Cataluña, de onde marcharon 10.957 españois en 2012 e 14.560 en 2013. En total, nos últimos dous anos houbo 25.517 emigrantes cataláns, aproximadamente un 0,3% do total da poboación da autonomía. Polo tanto, o ano pasado fóronse de Cataluña practicamente 40 persoas ao día de media.
Así mesmo, as 17 comunidades autónomas elevaron o número de inmigrantes de 2012 a 2013, consolidándose deste xeito unha tendencia crecente a buscar novos lugares de residencia noutros países.