O secretario xeral analizou coas asociacións galegas de Bos Aires a nova Lei de Galeguidade

(21/07/2014)

O secretario xeral analizou coas asociacións galegas de Bos Aires a nova Lei de Galeguidade



Mariana Ruiz, Bos Aires | 19 Xullo 2014 - Crónicas da Emigración



Antonio Rodríguez Miranda.

O secretario xeral de Emigración, Antonio Rodríguez Miranda, finalizou en Bos Aires, o venres 18, unha visita de tres días á Arxentina e Uruguai na que tomou contacto cos directivos das asociacións galegas asentadas nas capitais dos dous países.

O obxectivo, explicou Miranda, foi "clarificar as dúbidas" que puidese haber sobre a implementación da nova Lei de Galeguidade e as súas disposicións regulamentarias para o re-empadroamento e rexistro das entidades rexionais en ambos os dous países.

Nesta dirección, recordou que o prazo para que as asociacións se re-empadroen e rexistren comezou a rexer dende o 1 de xullo e finalizará o próximo mes de decembro.

Sobre este punto, o responsable galego de Emigración remarcou que a Administración autonómica "actuará de oficio" recoñecendo o status das entidades da colectividade e que "só se dirixirá a elas para solicitarlles a documentación que falte, de acordo á nova normativa vixente,".

Para asesorar e realizar o seguimento dos trámites que deben cumprir as sociedades, explicou, a Xunta de Galicia xa asignou dúas persoas "con dedicación exclusiva", e que, en setembro próximo, máis persoal se desprazará á Delegación do Goberno rexional na Arxentina para colaborar coas entidades na realización das devanditas tramitacións.

O rexistro, precisou, prevé distintas categorías para o empadroamento dos centros. Nesta dirección, as institucións que fundaron os emigrantes nos países de acollida poderán inscribirse como "Comunidades Galegas" ou como "Centros Colaboradores".

As entidades que queiran inscribirse na categoría de Comunidade Galega deberán cumprir con máis requisitos que as outras. Neste caso específico, apuntou Miranda, requírese que os centros conten cun número mínimo de socios (que de acordo ás circunstancias pode variar entre 150 e 400 socios) e que máis do 55% dos devanditos socios sexan galegos.

Ao respecto, o secretario xeral aclarou que a Xunta de Galicia considerará "galegas" aquelas persoas que teñan pasaporte español e vinculación con algún concello de Galicia, os seus fillos e os seus netos, aínda que estes non reúnan as condicións antes mencionadas.

Outro dos requisitos para as asociacións que queiran ser consideradas "Comunidades Galegas" estipula que deberán incorporar nos seus estatutos societarios unha cláusula que dispoña que, en caso de extinción, legarán o seu patrimonio (documental, cultural, artístico, arquitectónico, etc.) a Galicia ou outra entidade que goce de status de Comunidade Galega.

No seo da reunión privada, que tivo lugar o xoves 17 a partir das 19:30 horas, na sede do Centro Galicia de Bos Aires, Antonio Rodríguez Miranda, acompañado polo delegado do Goberno galego en Arxentina, Alejandro López Dobarro, esmiuzaron xunto aos representantes das asociacións galegas os detalles para a implementación desta normativa que xerou dúbidas nalgunhas entidades.

Tamén formou parte da axenda desta reunión o tratamento da nova normativa que establece os criterios de representatividade que terán as asociacións do colectivo no exterior no seo do Consello de Comunidades Galegas, órgano en cuxo seo se debaten propostas relacionadas coa cidadanía residente no exterior e a vida das asociacións rexionais para elaborar informes e propostas que se elevan ás autoridades autonómicas.

"Un gran parque temático"

Por último, Rodríguez Miranda contou en rolda de prensa que trasladou un agradecemento por adiantado aos directivos das entidades galegas de Arxentina que están a organizar conxuntamente a festa do 'Bos Aires celebra a Galicia', para o próximo 14 de setembro na cidade de Bos Aires.

"Unha celebración -dixo- novidosa", na que tamén estarán presentes os colectivos galegos de Uruguai e Chile e que "marcará un fito da presenza galega nesta cidade".

"Creo que conseguiremos que ese día Bos Aires sexa un pouquiño Galicia, como un gran parque temático", apuntou e opinou que será tamén unha forma de agradecerlle "ter acollido tantos compatriotas".