Os emigrantes retornados de Ourense únense á coordinadora galega

(18/07/2014)

Os emigrantes retornados de Ourense únense á coordinadora galega

A Asociación de Emigrantes Retornados de Ourense deixou onte de funcionar de forma efectiva. O colectivo, creado polos afectados polas reclamacións e multas de Facenda por non declarar e tributar polos ingresos que perciben dos países onde estiveron a traballar, transformouse en Plataforma de Emigrantes Retornados de Ourense.

A decisión tomárona medio centenar de membros da asociación, que onte se reunían no Edificio Sindical da capital e vai máis aló dun simple cambio de nome. Varía o seu funcionamento -xa non hai directiva nin socios, senón un grupo de portavoces que se encargará de organizar aos emigrantes para as accións que se decidan emprender-, pero o máis importante é que o colectivo ourensán pasa a integrarse na coordinadora galega de afectados por esta decisión de Facenda.

Ata o momento Ourense non formaba parte desta entidade que aglutina a 17 grupos doutras tantas comarcas galegas.