Os fillos de inmigrantes sofren a mesma discriminación que os de españois

Con respecto á primeira enquisa de 2008, crece nos nacidos no estranxeiro a identificación con España entre a adolescencia temperá e tardía: en 2008 só o 22,1% se sentía español mentres que en 2012 esa cifra se duplica ata o 43,1%.

Os datos revelan que as percepcións de discriminación entre os fillos de inmigrantes "son moi escasas", xa que aos 18 anos, "só" o 5% declarou tela sufrido "algunha ou moitas veces", unha cifra "practicamente idéntica" á dos de españois (6,1%).

No caso dos pais, un de cada catro afirma ter sido discriminado.

A cifras revelan, segundo o informe, un proceso de adaptación "xeralmente positivo" e unha "converxencia" psicolóxica e cultural entre os fillos de inmigrantes e os de nativos.

Neste sentido, apunta que o status socioeconómico, así como crecer en familias nas que os dous proxenitores están presentes e, de forma especial, as boas relacións entre pais e fillos na adolescencia temperá reducen as experiencias de discriminación en anos posteriores.

Respecto ao ámbito educativo, nos catro anos transcorridos dende a primeira e a segunda mostra, só o 15% abandonaron os estudos, un resultado que queda desviado pola "elevada" porcentaxe (o 32%) dos fillos de chineses que deixan o sistema educativo.

Así mesmo, a nota media é inferior á dos españois: 6,15 fronte a 6,54.

Máis dun terzo dos matriculados tratan de completar a Educación Secundaria, ou programas de Cualificación Profesional Inicial (PCPI), en tanto que o 44,1% está matriculado en Bacharelato ou Formación Profesional Superior, e o 4,7% xa accedeu á universidade.

O coñecemento do español mellora a media académica no 3% pero o "máis importante" corresponde á ambición do estudante, que está influída tamén polas expectativas familiares, que aumentan nun 6% as notas académicas dos fillos.

Malia que as rapazas inmigrantes obteñen mellores notas, a súa autoestima é máis baixa que a dos rapaces.

O 87,4% dos pais está moi satisfeito coa educación que reciben os seus fillos en España e opinan que terán as mesmas oportunidades de prosperar que os nativos (o 90,8%) e o 85% espera que os seus fillos sigan vivindo no país.

En canto ao emprego, o 12% dos menores inmigrantes entrevistados traballan (o 22,5% faino a tempo completo), e o 9,1% dos nativos, cifras que son baixas debido ao alto nivel de permanencia no sistema escolar.

Dos mozos inmigrantes que traballan, o 52,2% faino sen contrato e o 73,6% percibe menos de 600 euros mensuais, uns datos que non rexistran diferenzas significativas con respecto aos fillos de españois: o 53% traballa sen contrato e o 85,7% recibe menos de 600 euros ao mes.