As plataformas de emigrantes retornados que se formaron en Barbanza para loitar contra o cobro de multas, atrasos e intereses polas pensións do estranxeiro polas que non se cotizou teñen claro que continuar a pé de rúa, gritando contra o que consideran «un roubo», é o único que pode darlles resultado. Así que, de acordo con afectados de toda Galicia, estableceron un calendario de mobilizacións. Están convocadas protestas polo menos ata o mes de setembro. Onte tivo lugar unha delas en Santa Uxía.
Ás once, como xa é tradición, os emigrantes retornados volveron concentrarse na capital barbancesa armados con distintos obxectos para facer ruído, desde unha vella sirena a cacerolas ou cencerros traídos de Suíza. Hai meses, cando deron comezo as protestas, a maioría dos que acudían non recibiran aínda cartas de Facenda reclamándolles diñeiro polas pensións do estranxeiro. Pero agora as cousas cambiaron. E a maioría dos que suxeitan as pancartas tiveron que desembolsar cantidades importantes de diñeiro polas pagas que cobran do estranxeiro, xa que non cotizaran por elas. Hai quen leva pagados máis de 20.000 euros. Outros, bastante menos. Pero todos están igual de indignados.
Aínda que moitos dos manifestantes, persoas en idade da xubilación, nunca antes saíran á rúa, as protestas que levan encima fixéronlles endurecer o discurso. Onte, oíanse cousas como «ou nos devolven a pasta ou imos pola casta».
Por pasiva e activa, como o levan facendo desde o outono de 2013, os emigrantes retornados insisten en que lles están «roubando descaradamente». Moitos deles indican que no seu día preguntaron en Facenda e dixéronlles que non tiñan que declarar polas súas pensións e que agora se enfrontan ao pagamento de multas e atrasos. Polo tanto, e dado que de momento a súa mensaxe non calou no Executivo de Rajoy, todo o mundo está decidido a seguir adiante coas mobilizacións. Están convocadas protestas para os días 2 de xullo, 4 de agosto e 2 de setembro. A maiores haberá reunións dos membros das plataformas para analizar como avanzan as súas reclamacións ante Facenda.
