A nova comunidade de galegos no exterior ten tamén o seu propio espazo en LinkedIn ; a rede social profesional convértese en imprescindible para a nova emigración, os mozos que deixan Galicia na actualidade por falta de oportunidades. E talvez haxa un galego en algures do mundo que busque un perfíl similar: ¿Por que non pórlles en contacto?

Estes mozos que acaban de facer a maleta poden achar en Global Galicia información útil sobre que pasos seguir á hora de buscar oportunidades fóra; ligazóns a outros portais de referencia de cada zona, datos sobre o papelorio, a procura de emprego, de cursos ou de casa.

Pero este portal serve tamén para compartir información máis lúdica. Na sección Tips para o viaxeiro, anímase aos internautas a enviar os seus consellos do lugar onde vive: un parque ou un restaurante dos que non saen nas guías turísticas, ou un consello para usar un medio de transporte en calquera lugar, aquilo que a un lle gustase ler antes de ir ao sitio no que vive. E Sabores do Mundo recompila receitas curiosas: pratos exóticos con algún toque «galego» ou comidas típicas da gastronomía de aquí, adaptados aos produtos de alá.