Os suízos aprobaron nunha votación celebrada en febreiro deste mesmo ano o restablecemento de cotas migratorias para controlar os fluxos de traballadores proecedentes de países pertencentes á Unión Europea, unha proposta lanzada por un partido de dereitas. Un axustado 50,3 % apoiou esta resolución. ¿Como afectará esta medida á contratación de persoal sanitario no país helvético? A UE, coa que os suízos mantiñan acordos bilaterais, entre eles o de libre circulación, vixente desde o ano 2002, anunciou despois da votación que «revisaría as súas relacións» con este país.

Desde Suíza relativizan tanto o prazo de aplicación da norma como o impacto, sobre todo no referente a traballadores cualificados, xa que consideran que o seu mercado laboral seguirá absorbéndoos nos próximos anos.

Na empresa CarePers consideran que o proceso legal para poder instaurar a citada medida aínda se prolongará durante uns «oito ou nove meses», aproximadamente. Pero, sobre todo, engaden o seu convencemento de que non afectará ao seu sector. Porque argumentan que Suíza non pode renunciar á contratación de persoal sanitario, xa que existe un déficit de traballadores locais e esa demanda seguirá cubríndose. Apuntan a que o cambio normativo que aprobaron os suízos pon a lupa sobre os emigrantes sen cualificación que se instalan no país helvético sen ningún tipo de contrato nin expectativas de traballo a curto ou medio prazo. «E hai que matizar que ese non é o noso caso», recordan.

Neste sentido, a ministra suíza de Xustiza, Simonetta Sommaruga, explicou a altos cargos da UE en Bruxelas a principio deste mes a opción que apoiaran os seus compatriotas nas urnas: «Non votamos contra a inmigración senón que votamos un novo sistema de migración».

En Suíza consideran que a demanda de traballadores cualificados continuará.