Angrois, nos arredores de Santiago de Compostela, e Palmarin, na costa senegalesa, están separados por case 3.500 quilómetros. Desde hai uns días esa distancia é un pouco máis estreita. Polo menos, sentimentalmente están máis cerca. Posiblemente, os habitantes daquela comunidade rural africana xamais oíran falar do accidente de tren que o 24 de xullo levou por diante a 79 persoas na curva da Grandeira, en Angrois. Agora teñen o nome dunha daquelas vítimas na placa da súa escola de educación especial, a que acaban de estrear.
Chámase ese centro Jacobo Romero Rivera en recordo a unha das vítimas do Alvia. A súa noiva, Lucía Arousa Rey , tamén se deixou a vida naquel accidente. A escola é resultado do empeño persoal e a constancia de Begoña Romero , prima de Jacobo, e unha persoa moi vinculada á cooperación. No 2010 estivo na zona nun proxecto da Universidade das Palmas e quedouse coas ganas de consolidar aquela experiencia. Sobre todo polas carencias que detectou na atención a nenos con necesidades especiais. A distancia física entre Galicia e Senegal é medible en quilómetros, pero a distancia en sanidade, educación, infraestruturas... é complexa de calcular. Por abismal.
Comezou a darlle voltas á cabeza. E tras o accidente quixo cristalizar a idea con rapidez e creou unha asociación para xestionar todo o proxecto. Esa oenegué chámase Jaime Rever, xogo de palabras con j?aime rever (amo soñar, en francés, idioma oficial en Senegal). En apenas 9 meses aquela idea callou grazas a centos de colaboracións privadas ( organizáronse tamén torneos, concertos...). E, sobre todo, a achega da propia familia Rivera Romero .
A escola comezará a funcionar ao 100 % a partir de setembro. As súas instalacións xa están listas. Inauguráronse o pasado sábado, nun acto «alegre e emotivo, con música tradicional local, con tamtam senegalés e con caixón español», explica Begoña, que será unha das persoas que traballen nese centro, xunto a outros mestres locais e voluntarios españois (participan xa catro profesores).
Dese aire festivo do sábado contaxiáronse todos. Acudiron familiares de Jacobo Romero , autoridades locais, e 200 nenos da zona, parte dos cales poderán acceder aos servizos deste colexio público. Sobre todo aqueles con dificultades motoras, problemas de linguaxe, atraso mental... Para eses nenos, esta escola é unha realidade soñada durante moito tempo. A cara dunha cruz a 3.500 quilómetros.