Costa da Morte. Os emigrantes da zona xa son 6.000 máis que hai cinco anos

(21/03/2014)

Os emigrantes da zona xa son 6.000 máis que hai cinco anos

O padrón exterior roza as 36.000 persoas, e creceu 781 desde o 2013

 

Emigrantes da Costa da Morte, un domingo á hora do aperitivo no centro Atees, en Delémont. S. G.

 

A emigración na Costa da Morte segue crecendo, ano tras ano. No último, 781 persoas máis nos municipios de Bergantiños, Soneira e Fisterra, ademais de Cerceda. Desde fai un lustro, xa son 6.000 persoas máis as que están no exterior. Boa parte fóronse en busca de oportunidades, aínda que nesa cifra se inclúen tamén as altas na nacionalidade española, especialmente en países suramericanos. Pero xa non se produce o bum de cando cambiou a lei para ofrecer esta opción aos fillos e netos de emigrantes.

As novas cifras deunas a coñecer onte o Instituto Nacional de Estatística (INE), ao publicar o Padrón de Españois Residentes no Estranxeiro (PERE) a 1 de xaneiro do 2014. En total, 35.927 persoas procedentes dos 16 municipios da zona, fronte aos 29.944 de fai un lustro. Ou os 35.146 do ano pasado. De feito, houbo exercicios que creceu en máis de mil emigrantes, así que parece que se retardou. Unha das razóns poida que ser moitos dos que se van tardan agora máis que antes en darse de alto no consulado. Ocorre, por exemplo, en Suíza, onde aínda hai quen acode á aventura, tarda moito en atopar traballo (ou non o atopa), ou accede a el con contratos temporais. Se todo vai ben, moitas das chegadas tardarán en aparecer nos rexistros públicos.

Os municipios da zona achegan un de cada cinco emigrantes da provincia. Ou un de cada catro, se se suman os limítrofes, en idénticas circunstancias.

Carballo, no sétimo posto de Galicia