A proposta para modificar a Lei de Réxime Electoral Xeneral de 1985 foi aprobada por unanimidade na Cámara galega no ano 2008. E, aínda que no 2010 a norma xa foi cambiada cos votos do PP, PSOE, CIU e PNV, onte todos os grupos, excepto o BNG e ERC aprobaron tramitar unha nova modificación tras constatar o fracaso da normativa actual, que supuxo un derrubamento do número de votantes no exterior. De cifras de participación dos residentes no exterior en torno ao 30 % pasouse a menos do 5 %. Nas últimas eleccións autonómicas galegas, só o 3,25 % do censo no estranxeiro exerceu o seu dereito a voto, o que implica unha abstención do 96,75 %.
A deputada do PSdeG Carmela Silva defendeu a necesidade de recoñecer que a decisión tomada no 2010 «foi errónea», xa que a normativa vixente «non garante» o dereito fundamental ao voto, algo asumido tamén polo portavoz do PP, Alfredo Prada. A deputada do BNG Olaia Fernández Davila defendeu con todo a última reforma e expresou a súa sospeita de que detrás desta nova modificación para anular o voto rogado escóndese un intento de «volver atrás» eliminando as garantías introducidas.
A proposta do Parlamento galego supón equiparar o procedemento de voto dos emigrantes co resto de electores. En cada demarcación consular con máis de 500 españois censados estableceríanse seccións electorais, cada unha cunha urna e un máximo de 4.000 electores. O voto por correo con solicitude previa de papeleta, igual ao do resto dos españois, manteríase para quen non poidan achegarse aos consulados o día da votación.
Unha proposición de lei aprobada por unanimidade no Parlamento galego no 2008