Os emigrantes retornados continúan loitando contra o que consideran «un atropelo, un auténtico roubo». Trátase do cobro de multas, intereses e atrasos por parte de Facenda a conta das pensións que teñen do estranxeiro, polas que non cotizaban. Segundo a plataforma de Arousa Norte, hai nova nova onda de notificacións. É dicir, que cada vez son máis os afectados que teñen que desembolsar unha cantidade de diñeiro importante -hai quen tivo que pagar máis de 20.000 euros- por non ter sufragado os tributos correspondentes.

Só na plataforma de Arousa Norte hai ao redor de 200 afectados. Moitos deles prevén viaxar mañá á Coruña. Non en balde, os emigrantes retornados protagonizarán alí unha nova manifestación. Ademais, entregaranse a Facenda a miles de firmas recollidas en toda a provincia para que Facenda deixe de enviar notificacións. A plataforma de Arousa Norte deu onte as grazas aos concellos de Boiro e Rianxo, xa que o par de autocares que se fretarán para ir ata a cidade herculina sufragarano estes concellos. Desde o colectivo indicaron que as administracións máis próximas aos veciños están a darse conta do drama que supón este asunto para as persoas maiores.