O PP presentou durante o debate, no seo da Comisión do Pacto de Toledo, unha emenda para que se introducisen campañas de información e divulgación entre os emigrantes, pero sen facer mención expresa ao asunto das sancións.
Existen precedentes
A decisión do Congreso prodúcese pouco despois de que se coñecese que Facenda retirara a un retornado de Ourense a sanción alegando que, tal e como está redactada a normativa, pode interpretarse que o cobrado non está suxeito a imposición en España. Durante a súa intervención onte no Congreso, Olaia Fernández Davila acusou ao PP de «ser intolerante cun colectivo de pensionistas e moi xeneroso cos grandes defraudadores».
Aos 20.000 retornados galegos que xa foron obxecto dunha investigación durante o ano pasado por non declarar as pensións recibidas do estranxeiro desde o ano 2008, sumaranse este 2014 outros 30.000 pensionistas que emigraron. Ese é o número de persoas que prevé investigar o fisco en Galicia ao longo deste exercicio, segundo as previsións que manexan os propios traballadores da Axencia Tributaria na comunidade galega.