Os axentes do Servizo Marítimo da Comandancia da Garda Civil de Ceuta atoparon esta tarde o cadáver doutro inmigrante subsahariano en augas españolas, o que eleva a 12 o número de mortos na avalancha á fronteira da cidade autónoma a pasada semana.
Segundo informou a Delegación do Goberno, o achado produciuse ás 17.15 horas a uns 20 metros da beira na praia do Tarajal, o mesmo lugar onde foron localizados os outros dous cadáveres que chegaron a augas españolas. Os outros nove foron rescatados en Marrocos. Nesta ocasión, trátase tamén dun home duns 25 a 30 anos e carente de documentación para acreditar a súa identidade.
Os axentes do Servizo Marítimo da Garda Civil manteñen o seu dispositivo de procura no mar, tras a avalancha do pasado xoves na fronteira entre Marrocos e Ceuta que terminou en traxedia cando os inmigrantes se lanzaron ao mar para tratar de alcanzar a nado a costa da cidade autónoma española.
Dos doce cadáveres rescatados, nove apareceron en augas marroquís e os outros tres na praia do Tarajal, un o pasado sábado e outro onte, aos que se suma o achado esta tarde.