Preto de 5.000 preferentistas galegos cortaron durante dúas horas o centro de Vigo este mediodía para pedir a devolución de todos os seus aforros aos 35.000 afectados que aínda os teñen atrapados. Reclaman que haxa unha solución alternativa á juidicial mentres esperan que o 20 de marzo conclúa o prazo de 90 días para que NCG conceda unha solución a todos.
A organización eleva a 10.000 os asistentes mentres que a policía os reduce a 3.000.
Chegaron buses de Santiago, O Salnés, Carballo, Costa da Morte, Val Miñor, Marín e Pontevedra, Noia e Muros e Terra Chá, e foron apoiados por emigrantes retornados e plataformas Antidesahucios.
Os manifestantes congregáronse na contorna do Calvario e encheron toda a vía para baixar logo por Urzaiz ata a Porta do Sol, onde uns portavoces leron os seus comunicados. Unha afectada, no seu discurso, comparou a súa situación coa foto de África na que un neno moribundo está rodeado por un voitre á espera do festín, en alusión á banca e as multinacionais. «Estamos rodeados de voitres,» dixo unha das portavoces.
Un preferentista da plataforma de Carballo, que tocaron o tambor con bidóns de gasóil baleiros, dixo que metera 60.000 euros en preferentes e só recuperou o 50 % na quita, polo que reclama o que lle falta. «Ou arbitraxe acabouse, a mín ninguén me chamou», dixo.
Un portavoz de Santiago dixo que lle sorprendeu a afluencia de xente se se ten en conta que, a día de hoxe, moitos xa recuperaron todos os seus aforros.
Os emigrantes retornados que se queixan de que Facenda lles quere cobrar parte da pensión apoiaron a protesta. Da Costa da Morte acudiron tres autobuses. Un afectado de Santa Comba que debe 23.000 euros a Facenda indicou que na comarca debe haber ata 3.000 afectados e que están moi enfadados. No discurso en Pórtaa do Sol, un preferentisata e á vez afectado como emigrante retornado dixo que nos anos 70 eles mandaron divisas e o Goberno gastoullas en facer paradores de turismo que só gozaban algúns.
A concentración en Pórtaa do Sol finalizou cando os afectados entoaron a canción «Non moverannos».
A entidade NCG di que dos 75.264 clientes de produtos hibridos, 39.234 recuperaron o 100% do investimento, 37.960 conseguiron a devolución do 71 % do diñeiro. Segundo a organización de preferentistas, aínda hai 35.000 «estafados» que non recuperaron todos os seus aforros.