Dimite a tenente de alcalde de Piñor por un traballo no estranxeiro

Ourense / La Voz  31 de xaneiro de 2014  

A tenente de alcalde do Concello de Piñor (Ourense), Sandra Álvarez (PSOE), dimitiu onte do seu posto tras recibir unha proposta de traballo nunha adega da localidade suíza de Signy. Álvarez, de 33 anos e enxeñeira técnico agrícola, explicaba que a súa renuncia está motivada pola necesidade de dicir que si a un traballo, despois de anos formándose. «Está claro que marcho por necesidade, porque non atopo ningún traballo aquí, pero teño claro que se puidera elixir quedaríame en Piñor, sen pensalo», subliñaba onte minutos antes de embarcar cara a Suíza. Álvarez explicaba que a súa renuncia á acta de concelleira non significa que non siga ligada ao Concello e a todo o que ocorre no seu partido: «A renuncia só é iso, facelo a un cargo electo. Pero sigo ligada ao Concello e á política». Para ela resultaría imposible cumprir co seu labor a quilómetros de distancia. «Imaxínate, son tenente de alcalde, despois do rexedor. A política municipal de concellos como o meu é de proximidade. Tes que falar cos veciños, estar nas reunións xunto aos compañeiros. A distancia non permite ese trato», explica, e engade: «Non é a primeira vez que realizo pequenas estancias no estranxeiro por motivos laborais ou formativos, pero na actualidade, e ante un período de máis longa duración, é absolutamente incompatible coas funcións derivadas dun cargo político, sexa no ámbito que sexa. A política é para practicala, de xeito que repercuta no conxunto da cidadanía, a política non é para utilizala en beneficio persoal».