Barbanza. Os emigrantes retornados loitarán contra Facenda na rúa e no xulgado

(20/01/2014)

Os emigrantes retornados loitarán contra Facenda na rúa e no xulgado

Os afectados foron informados nunha asemblea en Boiro de sentenzas que obrigan a devolverlles intereses e multas

Escrito por:

María Hermida

ribeira / a voz  20 de xaneiro de 2014  

 

Á reunión celebrada no centro social boirense acudiron ao redor dun centenar de persoas. gestoso

Máis aló de que cheguen a lograr os seus obxectivos ou non, as asembleas celebradas en distintos puntos da comarca para abordar o problema que trae pola rúa da amargura aos emigrantes retornados -Facenda está a cobrarlles multas e intereses por pensións do estranxeiro polas que non cotizaban- están a servir para deixar clara unha cousa: que se trata dun conflito que afecta a moitísimos veciños e que os prexudicados non están dispostos a quedar de brazos cruzados. Así se demostrou o venres a última hora en Boiro, nunha reunión á que acudiron unhas cen persoas. Nese foro, nun ambiente de impotencia e enfado polas infraccións xa abonadas, decidiuse que a loita contra Facenda trasladarase tanto á rúa como aos xulgados.

Os emigrantes retornados, concretamente a plataforma de Arousa Norte, que foi a que convocou a reunión en Boiro, quere que a súa loita adquira visibilidade. Así que, entre outras cousas, vanse recoller firmas pedindo que deixen de chegar multas e cobros de intereses e que se devolvan as que xa foron abonadas. Esta campaña, en realidade, levará a cabo en toda Galicia, xa que parte da coordinadora que aglutina a todas as plataformas. Logo, tamén están previstas xa varias mobilizacións.

Explorando distintas vías

A maiores da loita na rúa, os emigrantes retornados empezan a proporse que talvez sexa hora de tocar tamén as portas da xustiza. Xosé Deira, exalcalde de Boiro e un dos portavoces desta plataforma, sinalou o seguinte: «Na reunión que tivemos explicámoslle á xente que xa saíron sentenzas que lle dan a razón aos afectados, e que obrigan a Facenda a devolverlles os cartos». Así que se considera que hai marxe de manobra a nivel xudicial. O problema é que presentar reclamacións nos xulgados de forma individual é caro, e a moitos prexudicados podería non compensarlles, por iso é polo que se estea mirando a posibilidade de presentar un recurso colectivo. Pero é algo que aínda está a se avaliar.

Mentres se estuda o tema, e vanse recollendo as firmas, a intención é celebrar tamén asembleas noutros municipios barbanceses, como A Pobra e Rianxo, para que os afectados deses lugares saiban os pasos que se están dando e avalíen se queren sumarse a esta batalla que, polo que parece, antóllase bastante longa.