A plataforma de emigrantes retornados insistiu onte en tres puntos. Primeiro, indicou que nas propias oficinas de Facenda sempre se lles dixo que non tiñan que tributar polas pagas do estranxeiro para evitar a dobre imposición, xa que xa lles descontaban unha cantidade nos países que lles pagaban. En segundo lugar, a plataforma incidiu en que no ano 2006 modificouse a lei e pasaron a ter que cotizar se cobraban máis de 11.000 euros -mentres que para as pensións españolas a cantidade é de 22.000 euros-, pero que esa norma non se aplicaba. Para rematar, concluíron o seguinte: «A partir do 2012, sen previo aviso, empézanse a cobrar atrasos e aplicarse multas. O cal é unha inxustiza total».
Ante este panorama, mañá darán luz verde a unha serie de actos reivindicativos. Prevén recoller firmas, manifestarse e non descartan recorrer á Xustiza. De todo iso darase conta na asemblea, á que se prevé que acudan numerosos afectados.