Iwannapp Mobile, unha empresa galega dedicada á creación de aplicacións para móbiles, acaba de desenvolver unha solución móbil gratuíta para conectar aos españois que cada día fan as maletas co fin de vivir unha experiencia fóra do seu país natal.
A app ExM (Españois polo Mundo) está dispoñible para os sistemas operativos iOS e Android e pon en contacto a usuarios que estean ou teñan estado no destino elixido; as persoas poderán comunicarse a través dun chat e varios filtros axudaranlles a atopar aos usuarios máis afíns á súa situación: erasmus, expatriados, emigrantes ou simples viaxeiros.
IwannApp naceu hai meses na Coruña, precisamente para dar vida a este proxecto dedicado a un colectivo que está a crecer nos últimos anos co gallo da crise e a falta de emprego en España. «A idea xurdiu ao ver que moitos dos nosos amigos decidían saír a outros países para desenvolverse profesionalmente e buscar novas oportunidades», explica un dos tres mozos que forman da empresa. Así, decidiron crear unha comunidade que facilitase o proceso da emigración, que axudase a pór en contacto a persoas que xa deran ese paso.
ExM pode resultar de gran utilidade para determinadas situacións, como resolver dúbidas sobre visados, aloxamentos, bancos, centros de ensino ou lugares onde comprar ou comer nun novo destino. Os seus creadores incluíron un chat dentro da propia app, «para que fluísen esas experiencias entre usuarios e fixéseo todo algo máis fácil», contan. O chat pódese habilitar e deshabilitar para que cada usuario decida a información que desexa mostrar; as mensaxes só se recibirán cando o usuario estea conectado e cada un poderá clasificar como amigos aos seus contactos ou bloquear a aqueles que considere oportuno.
ExM atópase agora nunha primeira versión e, sen ningún tipo de promoción, conta xa cun centenar de usuarios que a descargaron nos seus dispositivos desde diferentes lugares do mundo. Pero IwannApp traballa xa nunha nova actualización cunha visión máis comercial, na que os usuarios poidan tamén ofrecer outros servizos, como aluguer de cuartos, clases de idiomas ou guías turísticas.
