(04/11/2013)
redacción | lalín 31.10.2013 | Faro de Vigo
A Sociedade Fillos do Partido de Lalín na Habana outorgou o pasado 27 de outubro o título de socio de honor ao escritor Xosé Neira Vilas no transcurso da súa xunta xeral. A presidenta do colectivo, Mariña do Alicerce García Moreira, presentou a proposta do nomeamento do autor de Memorias dun neno labrego, que está a piques de cumprir 85 anos. Durante o acto, a investigadora Yolanda Vidal Felipe, que durante anos traballou xunto ao autor de Gres, destacou a presenza en Cuba de Neira Vilas desde o ano 1961, así como o seu labor no Ministerio da Industria Básica, a revista Zun Zun, ou os seus traballos sobre a emigración galega reflectidos na prensa cubana.
Na reunión tamén se inaugurou a exposición O espírito galego do Proxecto Arcángel formado por un grupo de novos artistas cuxa produción está inspirada en paisaxes, lendas e mitos de Galicia. Ademais, as irmás Mercés e Flora Igrexas Pérez recibiron o premio "Emigrante distinguida" que consistiu en senllas pezas de cerámica realizadas por artistas cubanos. Na reunión tamén se fixo balance da presenza dos grupos de danza da sociedade nos festivales realizados na capital cubana. A sesión contou coa actuación do grupo Viravoltas de danza que dirixe Mariela Lorenzo, e concluíu cun brindis en honor a Neira.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas