Ao redor de medio centenar de emigrantes retornados, procedentes de diferentes municipios da comarca, concentráronse onte fronte á delegación da Axencia Tributaria de Monforte en protesta polas sancións que se lles están aplicando por non ter cotizado polas pensións doutros países. A mobilización desenvolveuse entra as once da mañá e as doce do mediodía, en presenza de dúas patrullas da Policía Nacional. Os manifestantes corearon diversas consignas contra o trato que lles dispensa Facenda.

«Non é normal que estean tratando como estafadores a xente que axudamos a levantar este país despois de pasar por moitas cando estábamos fóra», sinala Eloy Fernández, portavoz da plataforma de afectados constituída na comarca de Monforte. A regularización fiscal do período 2008-2012 suporá no seu caso o pagamento duns 6.000 euros. «Sempre que fixen a declaración aquí deixei claro que tiña unha pequena paga do estranxeiro e agora avísanme de golpe de que teño que pagar todos eses cartos», denuncia este emigrante retornado.

A plataforma comarcal esixe que se lles facilite a regularización das súas obrigacións fiscais sen recargas nin intereses de demora, así como a anulación dos expedientes sancionadores que están a ser notificados aos retornados que non tributaban ata agora polas pagas dos países aos que emigraron no seu día. A concentración de onte contou co apoio dos responsables na zona da CIG, Xosé Manuel Silva, e de UGT, Mario Docasar. Tamén participaron a concelleira do BNG en Monforte Pilar López e o seu compañeiro de filas na Pobra Ricardo Rodicio, ademais do coordinador comarcal do PSOE, Roberto Castro.