Martin Schulz: "Europa debe admitir que necesita inmigración legal"

(21/10/2013)

Martin Schulz: "Europa debe admitir que necesita inmigración legal"

"Non é doado, pero vai haber un cambio" na política europea de Alemaña, opina o presidente do Parlamento Europeo | "Fai falta disciplina, pero sen crecemento e emprego non se sanearán as débedas", comenta sobre a crise do euro | "Nas eleccións ao Parlamento vótase ao sucesor de Barroso na Comisión Europea", explica

 La Vanguardia | 20/10/2013 - 
  

Schulz na casa de Robert Schuman, fundador da unión europea Afp

Beatriz Navarro | Bruxelas

Correspondente


Son días de frenética actividade para Martin Schulz, presidente do Parlamento Europeo. Bruxelas cheira a eleccións europeas (celébranse en maio), en Berlín o seu partido negocia gobernar en coalición con Angela Merkel, e el acaba de ser nomeado polo grupo socialista da Eurocámara candidato a presidir a Comisión. Schulz fai un severo diagnóstico da situación actual e augura cambios ou "graves problemas" se estes non chegan.


Días antes das eleccións alemás vaticinou que se se formaba unha gran coalición asistiriamos a unha gran viraxe europea. Manteno agora que negocian gobernar con Merkel?
Que os conservadores queiran gobernar cos socialistas é xa un xiro importante. As negociacións formais non empezaron, pero se hai certa reticencia en ambos os dous partidos é porque vai haber un gran xiro: a CDU deberá corrixir as orientacións que guiaron ao seu Goberno ata agora. Nós trataremos de influír ao máximo para levalo nunha dirección diferente á que seguiu ata agora. Non é doado, pero vai haber un xiro.

En que se traducirá? Cre que a CDU aceptará a idea de crear un fondo de amortización para alixeirar a débeda dalgúns países? O seu partido deféndea, pero Merkel rexéitaa.
Haberá que chegar a un acordo, ver ata onde pode ir cada un. Os compromisos sempre xorden do interese común, e o interese común para todos, España incluída, é encontrar unha solución para recapitalizar os bancos sen aumentar a débeda soberana. É crucial encontrar unha solución. Como se fará? Xa veremos pero é un obxectivo compartido.


Deixará Berlín de tomar decisións e dar pasos na UE só en situacións de emerxencia?
Trataremos de convencer os nosos socios de que unha disciplina fiscal sostida é necesaria, pero tamén de que non sanearemos as contas nin as débedas sen crecemento e emprego. O crecemento crea emprego e o emprego produce estabilidade social, o que á súa vez impulsa o consumo e este, o crecemento. Temos de activar ese círculo virtuoso.


Moitos cidadáns ven as eleccións alemás como máis importantes que as europeas.
Nas eleccións ao Parlamento Europeo estás a votar ao sucesor de Barroso. Un voto ao PE é un xeito directo de dicir que Europa queremos, en que dirección hai que ir. Por primeira vez o PE ten a primeira e última palabra sobre o posto executivo mais importante da UE, o presidente da Comisión. É tan importante como as eleccións alemás.


Pero dende que comezou a crise os gobernos nacionais tomaron as rendas e marxinaron as institucións.
Unha razón de máis para votar ao Parlamento. Moita xente quéixase de que a raíz da crise os xefes de Estado e de goberno concentraron todo o poder e din con razón que iso non é democrático. Por iso úrxolles a usar o seu dereito a votar. Temos a oportunidade de reequilibrar a repartición de poderes na UE.

Pero o proceso de elección do presidente da Comisión non é tan automático como vostede o describe e algúns líderes desconfían da xogada de que a decisión xurda directamente do PE, porque non queren deixar a elección dun posto tan importante en mans de electores e eurodeputados.
A formulación da súa pregunta é moi interesante. Indica que hai xente que non quere aceptar que o Parlamento e a xente decidan sobre Europa. E ten toda a razón. Hai moitos presidentes e primeiros ministros que din que o que pasa en Europa o deciden eles, ninguén máis. Esta situación é a definición perfecta da crise en que estamos. Deixar que 28 dirixentes tomen decisións a porta pechada, por unanimidade, non é a solución para a democracia europea. Se os gobernos non queren participar, eles verán. Pero a realidade é que o tratado cambiou e tras as eleccións os grupos políticos farán unha proposta.


E se o Consello non a asume?
Se din que lles dá igual, malia estar obrigados a ter en conta as eleccións, auguro tempos moi problemáticos. Pero non vai acontecer, porque todos os grupos presentarán candidatos. Os socialistas propuxéronme a min, o PPE decidirá o seu en marzo, os Verdes farán primarias... O proceso está en marcha.


A crise afundiu a confianza cidadá na UE mesmo en países como España, onde historicamente se viu Europa como a solución.
Entendo a xente que estea decepcionada ou non confíe na UE. Pero non todo o mundo que a critica é euroescéptica. Unha abafadora maioría da xente está convencida de que a cooperación transnacional e a creación de institucións comúns é a mellor idea que Europa tivo xamais. Pero un crecente número de cidadáns xa non identifica esa idea coa UE. Para moitos, Europa era a promesa dun futuro mellor, seguridade, emprego... Promesas que -salvo a da paz- non se cumpriron. Para recuperar a súa confianza, debemos cumprir o prometido e non prometer o que non podemos ofrecer. A xente aceptará facer sacrificios polo ben dos seus fillos se a melloría é visible. En España, en cambio, pedímoslles que se sacrifiquen e ao mesmo tempo deixamos que os máis novos estean sen emprego. Metemos miles de millóns en salvar bancos e non hai nada para 5 millóns de mozos desempregados? Solucionar o paro xuvenil é crucial para a supervivencia da eurozona.

Tras as últimas traxedias en Lampedusa, criticouse a UE por non ser eficaz na loita contra a inmigración ilegal, pero apenas competencias e nin recursos. Pódese seguir así?
O único instrumento da UE neste terreo é a convención de Dublín e só esta cobre o asilo político. A xente chega por máis razóns: guerras, desastres naturais, fame... Europa necesita un sistema de inmigración legal. Os Estados deben admitir que somos un continente de inmigración. Moitos países négano, din que non debe haber inmigrantes en Europa, pero iso é unha ilusión. Chegan constantemente.


Os partidos tradicionais calan e os extremistas tiran proveito da situación. Teme que se note nas eleccións?
Si, por iso falo tan claro. Hai que explicar que a mellor forma de loitar contra o crime organizado e a inmigración ilegal é organizar a legal. Así tes máis xustificación moral para rexeitar os que chegan ilegalmente.