Ao redor de medio centenar de emigrantes déronse cita na reunión celebrada a noite do mércores en Cachafeiro, en Forcarei. Un encontro, ao que asistiron, entre outros, a senadora socialista, Paula Fernández Pena, e representantes da plataforma estradense.
Un dos afectados de Forcarei, Germán Marquez, mostrábase satisfeito con este encontro, coa resposta veciñal e tamén coa información recibida. Un dos acordos adoptados foi o de unirse á plataforma da Estrada a fin de axuntar forzas e participarán na concentración do día 23. Márquez calcula que no municipio de Forcarei hai douscentos afectados aos que lles reclama Facenda. Sinala que «saímos a gañarnos a vida e agora veñennos con esta propina».
Na reunión moitos dos asistentes apuntaron que xa pagaran as multas de Facenda. Os afectados destacan que os consellos recibidos na reunión por parte dunha avogada era que reclamasen e presentasen de igual modo un recurso.
Moción plenaria
Onte as reclamacións dos emigrantes retornados foron tamén tema no pleno de Forcarei. Nela debateuse unha moción presentada polo BNG. A portavoz nacionalista., Anabel Gulías, apuntou que «aínda que pediamos moitas cousas o reducimos todo a que o Concello convocase unha charla cos veciños en colaboración coa plataforma de afectados». O PP votou a favor de esixir que se cambie a lei e deixar os locais do Concello se lle son solicitados. A alcaldesa, Belén Cachafeiro, sinalou que «estamos para apoiar os veciños, pero terán que vir primeiro e si o solicitan non teño ningún problema». Cachafeiro considera que as demandas debían ter chegado ao Concello por boca dos afectados e non a través dunha moción . Ana Doval, do PSOE destacou a fricción neste punto que motivou a intervención de ata catro edís do PP e queixouse, do mesmo xeito que a portavoz do BNG, que Cachafeiro rexeitar asinar a favor dos afectados.