Tras participar onte na manifestación de Santiago, membros do Colectivo de Emigrantes Retornados da Mariña convocaron unha nova protesta para esixir que se anulen as sancións que lles foron impostas por non ter declarado as pensións que reciben doutros países e para reclamar un cambio lexislativo. Convocaron unha protesta para o mércores 29 en Foz ante a Delegación de Facenda. Será ás 12.00 horas. Baixo o lema "Emigrantes retornados, pensionistas defraudados" os afectados esixirán unha solución ao seu problema. Insisten en que nunca recibiron información en relación coa súa obrigación de declarar as contías das pensións recibidas dos países nos que traballaron. Na comarca da Mariña o número de afectados pode roldar os 200, segundo algunhas fontes do colectivo.