Desde o comité comarcal do Bloque destacan que estes pensionistas, «ademais da obriga de pagamento, padecen a ameaza de sancións e intereses de demora, mesmo para persoas xa falecidas», e sinalan que as cantidades a pagar son, en moitos casos, moi elevadas e dirixidas a persoas con pensións baixas. Para o BNG, esta actitude do Goberno central «contra emigrantes galegos contrasta coa "comprensión" ofrecida aos evasores fiscais, aos que se lles concede amnistía».
Así mesmo, o Bloque recorda que as persoas ás que agora reclama facenda non recibiran información algunha e, xa que logo, «existía un total descoñecemento da obriga de facer a declaración do IRPF» polas pensións percibidas no estranxeiro. Isto, din, confirma que non existía intención algunha de defraudar.